2018年Nobel生理醫學獎—癌症免疫療法的先行者 2018 nî Nobel sing-lí-i-ha̍k-tsióng—gâm-tsìng bián-i̍k-liâu-huat ê sian-hîng-tsiá

阻止免疫系統「踏擋仔」來治療癌症 Tsóo-tsí bián-i̍k-hē-thóng “ta̍h-tòng-á” lâi tī-liâu gâm-tsìng

2018年的Nobel生理醫學獎決定頒發予發展癌症免疫療法的兩位學者:美國MD Anderson 癌症中心的James Allison和日本京都大學的Tasuku Honjo。Nobel委員會呵咾表示:𪜶兩位免疫學家透過刺激原底受壓制的免疫系統來對抗腫瘤,就若親像共一台車的車擋仔放掉仝款,予醫學界建立全新的癌症治療模式。這毋但是頭一擺Nobel生理醫學獎頒發予研究癌症療法的學者,也是自從舊年頒發予研究生理時鐘的科學家了後,閣再一擺以實際行動肯定做基礎研究的科學家。

2018 nî ê Nobel sing-lí-i-ha̍k tsióng kuat-tīng pan-huat hōo huat-tián gâm-tsìng bián-i̍k liâu-huat ê nn̄g-uī ha̍k-tsiá: Bí-kok MD Anderson gâm-tsìng tiong-sim ê James Allison hām Ji̍t-pún Kiann-too-tāi-ha̍k ê Tasuku Honjo. Nobel uí-uân-huē o-ló piáu-sī: in nn̄g-uī bián-i̍k-ha̍k-ka thàu-kuè tshì-kik guân-té siū ap-tsè ê bián-i̍k-hē-thóng lâi tuì-khòng tsíng-liû, tō ná tshin-tshiūnn kā tsi̍t-tâi tshia ê tshia-tòng-á pàng-tiāu kāng-khuán, hōo i-ha̍k-kài kiàn-li̍p tsuân-sin ê gâm-tsìng tī-liâu bôo-sik. Tse m̄-nā sī thâu-tsi̍t-pái Nobel sing-lí-i-ha̍k tsióng pan-huat hōo gián-kiù gâm-tsìng liâu-huat ê ha̍k-tsiá, iā-sī tsū-tsiông kū-nî pan-huat hōo gián-kiù sing-lí-sî-tsing ê kho-ha̍k-ka liáu-āu, koh tsài tsi̍t pái í si̍t-tsè hîng-tōng khíng-tīng tsò ki-tshóo-gián-kiù ê kho-ha̍k-ka.

Nobel生理醫學獎一般是頒發予對人類健康有革命性貢獻的單一大突破,譬論2012年的人工多功能性幹細胞 (iPS cell)、2006年的RNA干擾 (RNA interference)、2003年的核磁共振(MRI)等等,攏佇醫學界有明顯的應用價值。雖罔基礎科學研究幫贊咱認捌這个世界,伊也是建立現代科技文明的底蒂,毋過單一研究結果欲成做對人類有大利益的應用是不止仔艱難,大多數的應用科技攏是建立佇幾若个基礎研究的成果。濟濟做基礎研究的優秀科學家因為欠缺會當影響人類的單一大發明,煞無資格來接受提名成做Nobel獎的候選人。這遍這兩位免疫學家會著獎,主要是𪜶佇1990年代起鼓進行有關免疫系統運作的研究成果,紲落去予藥廠利用來開發治療癌症的免疫療法。

Nobel sing-lí-i-ha̍k tsióng it-puann sī pan-huat hōo tuì jîn-luī kiān-khong ū kik-bīng-sìng kòng-hiàn ê tan-it tuā tu̍t-phuà, phì-lūn 2012 nî ê jîn-kang to-kong-lîng-sìng kàn-sè-pau (iPS cell), 2006 nî ê RNA kan-jiáu (RNA interference), 2003 nî ê hi̍k-tsû kiōng-tsín (MRI) tíng-tíng, lóng tī i-ha̍k-kài ū bîng-hián ê ìng-iōng kè-ta̍t. Sui-bóng ki-tshóo-kho-ha̍k gián-kiù pang-tsān lán jīn-bat tsit-ê sè-kài, i iā-sī kiàn-li̍p hiān-tāi kho-ki bûn-bîng ê té-tì, m̄-koh tan-it gián-kiù kiat-kó beh tsiânn-tsò tuì jîn-luī ū tuā-lī-ik ê ìng-iōng sī put-tsí-á kan-lân, tuā-to-sòo ê ìng-iōng-kho-ki lóng sī kiàn-li̍p tī kuí-nā-ê ki-tshóo gián-kiù ê sîng-kó. Tsē-tsē tsò ki-tshóo-gián-kiù ê iu-siù kho-ha̍k-ka in-uī khiàm-khuat ē-tàng íng-hióng jîn-luī ê tan-it tuā huat-bîng, suah bô tsu-keh lâi tsiap-siū thê-miâ tsiânn-tsò Nobel tsióng ê hāu-suán-jîn. Tsit piàn tsit nn̄g-uī bián-i̍k-ha̍k-ka ē tio̍h-tsióng, tsú-iàu sī in tī 1990 nî-tāi khí-kóo tsìn-hîng iú-kuan bián-i̍k-hē-thóng ūn-tsok ê gián-kiù sîng-kó, suà––lo̍h-khì hōo io̍h-tshiúnn lī-iōng lâi khai-huat tī-liâu gâm-tsìng ê bián-i̍k-liâu-huat.

免疫系統 Bián-i̍k-hē-thóng

脊椎動物的免疫系統有分專門產生抗體的B細胞佮專門消滅病毒感染細胞和腫瘤細胞的T細胞。B細胞會分泌專一性誠懸的抗體來對抗體液(包含血液和淋巴液)中的病毒、細菌、以及外來毒素,予𪜶無才調對身體造成傷害,也就是發動所謂的體液免疫(humoral immunity)。T細胞會使分做三類:細胞毒性T細胞(cytotoxic T cell)、輔助T細胞(helper T cell)、以及抑制T細胞(regulatory T cell)。其中細胞毒性T細胞嘛有人共號做殺手T細胞(killer T cell),伊的功能是直接消滅受病毒感染抑是發生突變的細胞,也就是進行所謂的細胞免疫(cellular immunity)。T細胞時時刻刻攏踮體內四界咧巡邏,搜揣任何受病毒感染或者時發生突變的細胞。透過伊表面的「受體」(receptor) 和目標細胞細胞膜頂相對應的「配體」 (ligand)結合,T細胞就會使辨識目標細胞的身份,若準拄著受病毒感染或者是癌化的細胞,因為細胞表面通常會留下病毒抑是突變的記號(所謂的抗原),T細胞會受刺激來發動細胞毒殺的免疫反應,共目標細胞刣死,避免病毒佮癌細胞繼續生湠。

Tsik-tsui-tōng-bu̍t ê bián-i̍k-hē-thóng ū hun tsuan-bûn sán-sing khòng-thé ê B sè-pau kap tsuan-bûn siau-bia̍t pēnn-to̍k kám-jiám sè-pau hām tsíng-liû-sè-pau ê T sè-pau. B sè-pau ē hun-pì tsuan-it-sìng tsiânn kuân ê khòng-thé lâi tuì-khòng thé-i̍k (pau-hâm hueh-i̍k hām lîm-pa-i̍k) tiong ê pēnn-to̍k, sè-khún, í-ki̍p guā-lâi to̍k-sòo, hōo in bô-tsâi-tiāu tuì sin-thé tsō-sîng siong-hāi, iā-tō-sī huat-tōng sóo-uī ê “thé-i̍k-bián-i̍k” (humoral immunity). T sè-pau ē-sái hun-tsò sann-luī: sè-pau-to̍k-sìng T sè-pau (cytotoxic T cell), hú-tsōo T sè-pau (helper T cell), í-ki̍p ah-tsè T sè-pau (regulatory T cell). Kî-tiong sè-pau-to̍k-sìng T sè-pau mā ū lâng kā hō-tsò sat-tshiú T sè-pau (killer T cell), i ê kong-lîng sī ti̍t-tsiap siau-bia̍t siū pēnn-to̍k kám-jiám a̍h-sī huat-sing tu̍t-piàn ê sè-pau, iā-tō-sī tsìn-hîng sóo-uī ê “sè-pau-bián-i̍k” (cellular immunity). T sè-pau sî-sî-khik-khik lóng tiàm thé-lāi sì-kè teh sûn-lô, tshiau-tshuē jīm-hô siū pēnn-to̍k kám-jiám hi̍k-tsiá sī huat-sing tu̍t-piàn ê sè-pau. Thàu-kuè i piáu-bīn ê “siū-thé” (receptor) hām bo̍k-piau sè-pau sè-pau-mo̍oh tíng sio-tuì-ìng ê “phuè-thé” (ligand) kiat-ha̍p, T sè-pau tō ē-sái piān-sik bo̍k-piau-sè-pau ê sin-hūn, nā-tsún tú-tio̍h siū pēnn-to̍k kám-jiám hi̍k-tsiá sī gâm-huà ê sè-pau, in-uī sè-pau piáu-bīn thong-siông ē lâu-hā pēnn-to̍k a̍h-sī tu̍t-piàn ê kì-hō (sóo-uī ê “khòng-guân”), T sè-pau ē siū tshì-kik lâi huat-tōng sè-pau-to̍k-sat ê bián-i̍k-huán-ìng, kā bo̍k-piau-sè-pau thâi––sí, pī-bián pēnn-to̍k kap gâm-sè-pau kè-siok senn-thuànn.

癌症免疫療法 Gâm-tsìng bián-i̍k-liâu-huat

俗語講:水能載舟,亦能覆舟。免疫系統有齊全的武器會使保護咱袂受入侵者傷害,毋過伊若是過度活跳嘛有可能會走精,顛倒來傷害著正常細胞。為著避免這个問題,T細胞表面有號做「免疫檢查點」(immune checkpoint)的受體,會扮演親像一台車的「車擋仔」的角色,阻擋T細胞攻擊正常細胞。有誠濟「自體免疫病症」(autoimmune disease)的發生就是源自基因突變予免疫檢查點失去功能,造成T細胞無受控制來傷害家己的細胞組織。

Sio̍k-gí kóng: suí lîng tsài-tsiu, i̍k lîng hok-tsiu. Bián-i̍k-hē-thóng ū tsiau-tsn̂g ê bú-khì ē-sái pó-hōo lán bē siū ji̍p-tshim-tsiá siong-hāi, m̄-koh i nā-sī kuè-tōo ua̍h-thiàu mā ū khó-lîng ē tsáu-tsing, tian-tó lâi siong-hāi tio̍h tsìng-siông-sè-pau. Uī-tio̍h pī-bián tsit ê būn-tê, T sè-pau piáu-bīn ū hō-tsò “bián-i̍k-kiám-tsa-tiám” (immune checkpoint) ê siū-thé, ē pān-ián tshin-tshiūnn tsi̍t-tâi tshia ê “tshia-tòng-á” ê kak-sik, tsóo-tòng T sè-pau kong-kik tsìng-siông-sè-pau. Ū tsiânn tsē “tsū-thé-bián-i̍k pēnn-tsìng” (autoimmune disease) ê huat-sing tō-sī guân-tsū ki-in-tu̍t-piàn hōo bián-i̍k-kiám-tsa-tiám sit-khì kong-lîng, tsō-sîng T sè-pau bô siū khòng-tsè lâi siong-hāi ka-tī ê sè-pau tsoo-tsit.

不而過,這个原底咧預防T細胞傷害家己人的擋仔,煞定定成做腫瘤細胞走閃T細胞攻擊的保護傘,予癌細胞會使無受控制的生湠無煞。James Allison佇1990年代發見佇T細胞頂頭的一个叫做CTLA-4 (cytotoxic T-lymphocyte-associated protein 4)的檢查點卵白質(checkpoint protein),佇和「樹突細胞」(dendritic cell, 一種會指示T細胞對腫瘤發動攻擊的免疫細胞)表面相對應的受體結合了後,會造成T細胞無才調辨識腫瘤來共伊消滅。Allison的團隊佇1997年設計出會當阻礙CTLA-4佮樹突細胞受體結合的抗體,予T細胞會使共腫瘤細胞看現現來對伊發動攻擊。

Put-jî-kò, tsit-ê guân-té teh ī-hông T sè-pau siong-hāi ka-tī lâng ê tòng-á, suah tiānn-tiānn tsiânn-tsò tsíng-liû-sè-pau tsáu-siám T sè-pau kong-kik ê pó-hōo-suànn, hōo gâm-sè-pau ē-sái bô siū khòng-tsè ê senn-thuànn bô-suah. James Allison tī 1990 nî-tāi huat-kiàn tī T sè-pau tíng-thâu ê tsi̍t-ê kiò-tsò “CTLA-4” (cytotoxic T-lymphocyte-associated protein 4) ê kiám-tsa-tiám nn̄g-pe̍h-tsit (checkpoint protein), tī hām “sū-tu̍t-sè-pau” (dendritic cell, tsi̍t-tsióng ē tsí-sī T sè-pau tuì tsíng-liû huat-tōng kong-kik ê bián-i̍k-sè-pau) piáu-bīn sio-tuì-ìng ê siū-thé kiat-ha̍p liáu-āu, ē tsō-sîng T sè-pau bô-tsâi-tiāu piān-sik tsíng-liû lâi kā i siau-bia̍t. Allison ê thuân-tuī tī 1997 nî siat-kè tshut ē-tàng tsóo-gāi CTLA-4 kap sū-tu̍t-sè-pau siū-thé kiat-ha̍p ê khòng-thé, hōo T sè-pau ē-sái kā tsíng-liû-sè-pau khuànn-hiān-hiān lâi tuì i huat-tōng kong-kik.

這个會阻斷CTLA-4檢查點功能(immune checkpoint blockade)的抗體紲落去予藥廠進一步發展做一種號做ipilimumab的檢查點抑製劑(checkpoint inhibitor),佇2010年臨床試驗中,ipilimumab成功予尾期的皮膚癌患者體內的腫瘤萎縮甚至消失。美國食品及藥物管理局(US Food and Drug Administration, FDA) 佇2011年正式核準ipilimumab上市來治療皮膚癌。

Tsit-ê ē tsóo-tn̄g CTLA-4 kiám-tsa-tiám kong-lîng (immune checkpoint blockade) ê khòng-thé suà––lo̍h-khì hōo io̍h-tshiúnn tsìn-tsi̍t-pōo huat-tián tsò tsi̍t-tsióng hō-tsò “ipilimumab” ê kiám-tsa-tiám ah-tsè-tse (checkpoint inhibitor), tī 2010 nî lîm-tshn̂g-tshì-giām tiong, ipilimumab sîng-kong hōo bué-kî ê phuê-hu-gâm huān-tsiá thé-lāi ê tsíng-liû ui-sok sīm-tsì siau-sit. Bí-kok si̍t-phín ki̍p io̍h-bu̍t kuán-lí-kio̍k (US Food and Drug Administration, FDA) tī 2011 nî tsìng-sik hi̍k-tsún ipilimumab tsiūnn-tshī lâi tī-liâu phuê-hu-gâm.

Tasuku Honjo 佇1992年發見另外一个佇T細胞表面的檢查點卵白質,共號做PD-1 (programed death-1)。雖罔PD-1和CTLA-4攏會阻擋T細胞對腫瘤發動攻擊,𪜶兩个有無相仝的作用機制。PD-1會和腫瘤細胞頂的受體結合,這个作用紲落去會予腫瘤細胞壓制T細胞對伊的毒殺作用。透過會使阻斷PD-1佮腫瘤細胞受體結合所設計的檢查點抑製劑,佇臨床發見有比ipilimumab閣較闊的治癌用途,伊佇肺癌、腰子癌、淋巴癌以及皮膚癌等等13種癌症攏有誠好的療效。

Tasuku Honjo tī 1992 nî huat-kiàn līng-guā tsi̍t-ê tī T sè-pau piáu-bīn ê kiám-tsa-tiám nn̄g-pe̍h-tsit, kā hō-tsò “PD-1 (programed death-1)”. Sui-bóng PD-1 hām CTLA-4 lóng ē tsóo-tòng T sè-pau tuì tsíng-liû huat-tōng kong-kik, in nn̄g-ê ū bô-sio-kāng ê tsok-iōng ki-tsè. PD-1 ē hām tsíng-liû sè-pau tíng ê siū-thé kiat-ha̍p, tsit-ê tsok-iōng suà––lo̍h-khì ē hōo tsíng-liû-sè-pau ap-tsè T sè-pau tuì i ê to̍k-sat tsok-iōng. Thàu-kuè ē-sái tsóo-tn̄g PD-1 kap tsíng-liû-sè-pau siū-thé kiat-ha̍p sóo siat-kè ê kiám-tsa-tiám ah-tsè-tse, tī lîm-tshn̂g huat-kiàn ū pí ipilimumab koh khah khuah ê tī-gâm iōng-tôo, i tī hì-gâm, io-tsí-gâm, lîm-pa-gâm í-ki̍p phuê-hu-gâm tíng-tíng 13 tsióng gâm-tsìng lóng ū tsiânn hó ê liâu-hāu.

免疫療法無親像其他時行的傳統癌症療法親像手術、化療、以及放射線等等直接消滅腫瘤,伊主要是透過叫醒咱家己天生的免疫系統來對抗癌症,伊較袂予患者有艱苦的副作用,而且閣會當予濟濟尾期患者加活幾若冬。科學家其實佇一百冬前就咧研究利用免疫系統來治療癌症的法度,毋過因為效果有限,煞無藥廠願意接紲落去發展。Allison和Honjo利用壓制免疫檢查點作用的「免疫檢查點療法」(immune checkpoint therapy),成功治療原底無藥通醫的尾期癌症,毋但予醫學製藥界改變對待癌症免疫療法的態度,嘛替濟濟著癌的患者帶來重生的希望。

Bián-i̍k-liâu-huat bô-tshin-tshiūnn kî-tha sî-kiânn ê thuân-thóng-liâu-huat tshin-tshiūnn tshiú-su̍t, huà-liâu, í-ki̍p hòng-siā-suànn tíng-tíng ti̍t-tsiap siau-bia̍t tsíng-liû, i tsú-iàu sī thàu-kuè kiò-tshénn lán ka-tī thian-sing ê bián-i̍k-hē-thóng lâi tuì-khòng gâm-tsìng, i khah bē hōo huān-tsiá ū kan-khóo ê hù-tsok-iōng, jî-tshiánn koh ē-tàng hōo tsē-tsē bué-kî huān-tsiá ke ua̍h kuí-nā-tang. Kho-ha̍k-ka kî-si̍t tī tsi̍t-pah tang tsîng tō teh gián-kiù lī-iōng bián-i̍k-hē-thóng lâi tī-liâu gâm-tsìng ê huat-tōo, m̄-koh in-uī hāu-kó iú-hān, suah bô io̍h-tshiúnn guān-ì tsiap-suà––lo̍h-khì huat-tián. Allison hām Honjo lī-iōng ap-tsè bián-i̍k-kiám-tsa-tiám tsok-iōng ê “bián-i̍k-kiám-tsa-tiám-liâu-huat” (immune checkpoint therapy), sîng-kong tī-liâu guân-té bô io̍h thang i ê bué-kî gâm-tsìng, m̄-nā hōo i-ha̍k-tsè-io̍h-kài kái-piàn tuì-thāi gâm-tsìng bián-i̍k-liâu-huat ê thāi-tōo, mā thè tsē-tsē tio̍h-gâm ê huān-tsiá tuà lâi tiông-sing ê hi-bāng.

在〈2018年Nobel生理醫學獎—癌症免疫療法的先行者 2018 nî Nobel sing-lí-i-ha̍k-tsióng—gâm-tsìng bián-i̍k-liâu-huat ê sian-hîng-tsiá〉中有 8 則留言

        1. 確實是按呢無毋著,所有ê辭典攏標「to̍k-sat」。T細胞釋放毒素共受感染ê細胞刣死,若親像毒(thāu)鳥鼠按呢,所擺我頭先會想欲用 “thāu-sat” 來標音。毋過既然所有ê辭典攏標「to̍k-sat」,我就照標準來。無定著「毒殺」是專有名詞,干焦有一種發音nā-tiānn。

          1. 抑是講「毒」(thāu)就好?「脊椎動物的免疫系統有分專門產生抗體的B細胞佮專門咧『毒』受病毒感染細胞的T細胞」,按呢?

  1. Wow, very unique blog! I hope original content in Taiwanese keep growing. Thanks for doing this.

留言板 Liû-giân-pán

這個網站採用 Akismet 服務減少垃圾留言。進一步了解 Akismet 如何處理網站訪客的留言資料