定定聽人講：頭殼愛較捷用咧，一般人干焦用著10%的腦力爾爾，實在真拍損。無毋著，無人會否認頭殼愈用會愈好。毋過，咱人敢干焦用著10%的腦力？若真正是按呢，賰的 90% 是用佇佗位？這个10% 理論到底是著抑是毋著？

Tiānn-tiānn thiann lâng kóng: thâu-khak ài khah tsia̍p iōng––leh, it-puann-lâng kan-na iōng tio̍h pah-hun-tsi-tsa̍p ê náu-li̍k niā-niā, si̍t-tsāi tsin phah-sńg. Bô m̄-tio̍h, bô lâng ē hónn-jīn thâu-khak lú iōng ē lú hó. M̄-koh, lán lâng kám kan-na iōng tio̍h pah-hun-tsi-tsa̍p ê náu-li̍k? Nā tsin-tsiànn sī án-ne, tshun––ê pah-hun-tsi-káu-tsa̍p sī iōng tī tó-uī? Tsit ê pah-hun-tsi-tsa̍p lí-lūn tàu-té sī tio̍h a̍h-sī m̄-tio̍h?

欲回答這个問題進前，咱先來看一个科學數據：咱人的頭腦干焦占全身軀 3% 的重量，煞用著 20% 的酸素(氧氣)佮養份。若欲提高咱頭殼的使用量到 20% 甚至是 30%，咱需要的酸素和養分著愛加偌濟呢? 咱敢需要加欶兩倍抑是三倍量的酸素？

Beh huê-tap tsit ê būn-tê tsìn-tsîng, lán sing-lâi khuànn tsi̍t ê kho-ha̍k-sòo-kù: lán lâng ê thâu-náu kan-na tsiàm tsuân sin-khu pah-hun-tsi-sann ê tāng-liōng, suah iōng tio̍h pah-hun-tsi-jī-tsa̍p ê sàng-sooh kap ióng-hūn. Nā beh thê-ko lán thâu-khak ê sú-iōng-liōng kàu pah-hun-tsi-jī-tsa̍p sīm-tsì sī pah-hun-tsi-sann-tsa̍p, lán su-iàu ê sàng-sooh hām ióng-hūn tio̍h ài ka guā-tsē––neh? Lán kám su-iàu ke suh nn̄g-puē a̍h-sī sann-puē-liōng ê sàng-sooh?

閣有，濟濟神經病症親像中風、Parkinson’s、抑是腦震盪等等，雖然干焦影響著小部分的腦組織，但是定定造成患者失去不止仔濟的腦功能。若咱人真正干焦用著 10% 的頭殼，是按怎遮的病症抑是創傷對患者以及傷者會有遮爾大的影響？敢真正遮拄好，逐擺攏去傷害著遐的重要的 10%。

Koh-ū, tsē-tsē sîn-king-pēnn-tsìng tshin-tshiūnn tiòng-hong, Parkinson’s, iah-sī náu-tsìn-tōng tíng-tíng, sui-jiân kan-na íng-hióng tio̍h sió-pōo-hūn ê náu-tsoo-tsit, tān-sī tiānn-tiānn tsō-sîng huān-tsiá sit-khì put-tsí-á tsē ê náu-kong-lîng. Nā lán lâng tsin-tsiànn kan-na iōng tio̍h pah-hun-tsi-tsa̍p ê thâu-khak, sī-án-tsuánn tsia-ê pēnn-tsìng a̍h-sī tshòng-siong tuì huān-tsiá í-ki̍p siong-tsiá ē ū tsiah-nī tuā ê íng-hióng? Kám tsin-tsiànn tsiah tú-hó, ta̍k-pái lóng khì siong-hāi tio̍h hia––ê tiōng-iàu ê pah-hun-tsi-tsa̍p.

神經影像 (neuroimaging) 是一種會使直接抑是間接觀察腦部運作的技術。咱真四常聽著的核磁共振 (MRI) 就是其中的一類。利用MRI，醫生佮科學家會當了解腦部每一部份組織的運作情形。根據 MRI 的畫面，科學家發現不管是佇清醒抑是睏眠中，咱規个頭腦的每一部份攏有咧運作，唯一的差別只是使用的程度無仝。親像用行的和用走的，攏需要用著跤，只是出力的程度無仝。日常生活中的啉水、看電視、抑是洗碗，每一个不管是簡單抑是幼路的動作，攏愛無仝部份的腦組織互相協調來完成。會使講咱人其實是用 100% 的頭殼，絕對毋是干焦用 10% 爾爾。

Sîn-king-iánn-siōng (neuroimaging) sī tsi̍t tsióng ē-sái ti̍t-tsiap a̍h-sī kàn-tsiap kuan-tshat náu-pōo ūn-tsok ê ki-sut. Lán tsin sù-siông thiann––tio̍h ê hi̍k-tsû-kiōng-tsín (MRI) tō sī kî-tiong ê tsi̍t luī. Lī-iōng MRI, i-sing kap kho-ha̍k-ka ē-tàng liáu-kái náu-pōo muí tsi̍t pōo-hūn tsoo-tsit ê ūn-tsok tsîng-hîng. Kin-kì MRI ê uē-bīn, kho-ha̍k-ka huat-hiān put-kuán sī tī tshing-tshínn a̍h-sī khùn-bîn tiong, lán kui ê thâu-náu ê muí tsi̍t pōo-hūn lóng ū leh ūn-tsok, uî-it ê tsha-pia̍t tsí-sī sú-iōng ê thîng-tōo bô-kāng.  Tshin-tshiūnn iōng kiânn––ê hām iōng tsáu––ê, lóng su-iàu iōng tio̍h kha, tsí-sī tshut-la̍t ê thîng-tōo bô-kâng. Ji̍t-siông-sing-ua̍h tiong ê lim tsuí, khuànn tiān-sī, a̍h-sī sé-uánn, muí tsi̍t ê put-kuán sī kán-tan a̍h-sī iù-lōo ê tōng-tsok, lóng ài bô kāng pōo-hūn ê náu-tsoo-tsit hōo-siong hia̍p-tiāu lâi uân-sîng. Ē-sái kóng lán lâng kî-si̍t sī iōng pah-hun-tsi-pah ê thâu-khak, tsua̍t-tuì m̄-sī kan-na iōng pah-hun-tsi-tsa̍p niā-niā.

所以講，這个10% 的講法是無正確的，必需愛緊共伊擲㧒捔才著。

Sóo-í kóng, tsit ê pah-hun-tsi-tsa̍p ê kóng-huat sī bô tsìng-khak––ê, pit-su ài kín kā i tàn-hiat-ka̍k tsiah tio̍h.