全文朗讀 Tsuân-bûn lóng-tho̍k
脂肪是咱人欲生存所需要的營養素，伊毋但是咱體內咧儲存能量的倉庫，閣有足濟對維持性命要緊的功能嘛著有伊才通成，比論講伊是起造神經纖維的重要原料，嘛會當幫贊咱吸收各類脂溶性也就是會佮油相溶的bi-tá-bín，閣有不止仔濟款的hoo-lú-bóng嘛需要脂肪才通合成。毋過因為這馬的人生活並古早人加足富裕，食食較無撙節，閣欠運動，身體共用無完的能量沓沓仔轉換做脂肪囤咧，年久月深了後就造成人大箍、著高血壓、若攏無咧要意，尾仔恐驚會致到親像糖尿病、心臟病佮中風彼款的慢性病。所致，若講著咱體內的脂肪，大多數的人凡勢攏共看做是歹物，設法欲緊共挕捒，就按呢毋但醫美診所時行抽脂手術，各大健身中心嘛定定咧拍廣告講𪜶的減肥課程有偌好拄偌好，向望通唌較濟人來報名。
Tsi-hông sī lán-lâng beh sing-tsûn sóo su-iàu ê îng-ióng-sòo, i m̄-nā sī lán thé-lāi leh tû-tsûn lîng-liōng ê tshng-khòo, koh ū tsiok tsē tuì î-tshî sènn-miā iàu-kín ê kong-lîng mā tio̍h ū i tsiah thang tsiânn, pí-lūn-kóng i sī khí-tsō sîn-king tshiam-î ê tiōng-iàu guân-liāu, mā ē-tàng pang-tsān lán khip-siu kok-luī tsi-iûnn-sìng iā tō sī ē kap iû sio-iûnn ê bi-ta-bín, koh ū put-tsí-á tsē khuán ê hoo-lú-bóng mā su-iàu tsi-hông tsiah thang ha̍p-sîng. M̄-koh in-uī tsit-má ê lâng ê sing-ua̍h phīng kóo-tsá-lâng ke tsiok hù-jū, tsia̍h-si̍t khah bô tsún-tsat, koh khiàm ūn-tōng, sin-thé kā īng bô uân ê lîng-liōng ta̍uh-ta̍uh-á tsuán-uānn tsò tsi-hông tún––leh, nî-kú-gue̍h-tshim liáu-āu tō tsō-sîng lâng tuā-khoo, tio̍h ko-hueh-ap, nā lóng bô teh iàu-ì, bué-á khióng-kiann ē tì-kàu tshin-tshiūnn thn̂g-jiō-pēnn, sim-tsōng-pēnn kap tiòng-hong hit-khuán ê bān-sìng-pēnn. Sóo-tì, nā kóng tio̍h lán thé-lāi ê tsi-hông, tuā-to-sòo ê lâng huān-sè lóng kā khuànn-tsò sī pháinn-mi̍h, siat-huat beh kín kā hìnn-sak, tsiū-án-ne m̄-nā i-bí tsín-sóo sî-kiânn thiu-tsi tshiú-su̍t, kok tuā kiān-sin tiong-sim mā tiānn-tiānn teh phah kóng-kò kóng in ê kiám-puî khò-thîng ū guā-hó tú guā-hó, ǹg-bāng thang siânn khah tsē lâng lâi pò-miâ.
不而過，咱體內的脂肪有兩種：白色脂肪佮咖啡色脂肪。白色脂肪囤佇白色脂肪細胞裡，白色脂肪細胞欠缺人講「細胞發電廠」的粒線體，致使伊代謝䆀，主要負責能量的儲存。伊若佇體內積傷濟會𠢕予人大箍、著心血管佮代謝疾病，所以定定予人譬相是䆀脂肪。咖啡色脂肪的功能拄好顛倒反，佇咖啡色脂肪細胞內有足濟粒線體，予伊看起來倚咖啡色。豐富的粒線體予伊代謝旺，直直共細胞內的葡萄糖佮脂肪等營養素燒來產生熱量，所擺咖啡色脂肪的量若愈濟，咱的基礎代謝率就愈懸，愈袂大箍，就按呢予人呵咾是好脂肪。兩冬前捌有臨床的調查發現體內咖啡色脂肪的量愈濟的人，較僫著親像高血壓佮糖尿病彼款的慢性病，毋過彼當時仔猶毋知影咖啡色脂肪是用啥號機制咧保護人的。
Put-jî-kò, lán thé-lāi ê tsi-hông ū nn̄g-tsióng: pe̍h-sik tsi-hông kah ka-pi-sik tsi-hông. Pe̍h-sik tsi-hông tún tī pe̍h-sik tsi-hông sè-pau ni̍h, pe̍h-sik tsi-hông sè-pau khiàm-khuat lâng kóng “sè-pau huat-tiān-tshiúnn” ê lia̍p-suànn-thé, tì-sú i tāi-siā bái, tsú-iàu hū-tsik lîng-liōng ê tû-tsûn. I nā tī thé-lāi tsik siunn tsē ē gâu hōo lâng tuā-khoo, tio̍h sim-hueh-kńg tsi̍t-pēnn, sóo-í tiānn-tiānn hōo lâng phì-siùnn sī bái tsi-hông. Ka-pi-sik tsi-hông ê kong-lîng tú-hó tian-tò-píng, tī ka-pi-sik tsi-hông sè-pau lāi ū tsiok tsē lia̍p-suànn-thé, hōo i khuànn––khí-lâi uá ka-pi-sik. Hong-hù ê lia̍p-suànn-thé hōo i tāi-siā ōng, ti̍t-ti̍t kā sè-pau lāi ê phû-tô-thn̂g kah tsi-hông tíng îng-ióng-sòo sio lâi sán-sing jia̍t-liōng, sóo-pái ka-pi-sik tsi-hông ê liōng nā lú tsē, lán ê ki-tshóo tāi-siā-lu̍t tō lú kuân, lú bē tuā-khoo, tsiū-án-ne hōo lâng o-ló sī hó tsi-hông. Nn̄g tang tsîng bat ū lîm-tshn̂g ê tiâu-tsa huat-hiān thé-lāi ka-pi-sik tsi-hông ê liōng lú tsē ê lâng, khah oh tio̍h tshin-tshiūnn ko-hueh-ap kah thn̂g-jiō-pēnn hit-khuán ê bān-sìng-pēnn, m̄-koh hit-tang-sî-á iáu m̄ tsai-iánn ka-pi-sik tsi-hông sī īng siánn-hō ki-tsè teh pó-hōo lâng––ê.
咖啡色脂肪保護咱的秘密 Ka-pi-sik tsi-hông pó-hōo lán ê pì-bi̍t
為怎樣人愈大箍，著高血壓的機率愈懸？一般人可能攏認為這是誠簡單的常識，袂興去共稽考。毋過就佮牛頓去予樹仔頂落落來的蘋果掔著頭，因為好玄去走揣因端，終其尾予伊揣著影響科學界極大的萬有引力仝款，看起來真平常的代誌，若好好仔共伊研究到透，無的確會有料想袂到的大貢獻。美國Rockefeller大學的教授Paul Cohen就是其中一个先行者，伊對2015年開始，就開足濟時間咧走揣大箍交高血壓的關係。伊參伊實驗室的博士後學者Mascha Koenen，佇今年初出刊的《科學》期刊發表𪜶研究這件代誌幾若冬的成果。
Uī-tsuánn-iūnn lâng lú tuā-khoo, tio̍h ko-hueh-ap ê ki-lu̍t lú kuân? It-puann lâng khó-lîng lóng jīn-uî tse sī tsiânn kán-tan ê siông-sik, bē hìng khì kā khe-khó. M̄-koh tō kah Gû-tùn khì hōo tshiū-á tíng lak––lo̍h-lâi ê phông-kó khian tio̍h thâu, in-uī hònn-hiân khì tsáu-tshuē in-tuann, tsiong-kî-bué hōo i tshuē tio̍h íng-hióng kho-ha̍k-kài ki̍k tuā ê bān-iú-ín-li̍k kāng-khuán, khuànn––khí-lâi tsin pîng-siông ê tāi-tsì, nā hó-hó-á kā i gián-kiù kàu thàu, bô-tik-khak ē ū liāu-sióng-bē-kàu ê tuā kòng-hiàn. Bí-kok Rockefeller tāi-ha̍k ê kàu-siū Paul Cohen tō sī kî-tiong ê tsi̍t ê sian-hîng-tsiá, i uì 2015 nî khai-sí, tō khai tsiok tsē sî-kan teh tsáu-tshuē tuā-khoo kiau ko-hueh-ap ê kuan-hē. I tsham i si̍t-giām-sik ê phok-sū-āu ha̍k-tsiá Mascha Koenen, tī kin-nî-tshe tshut-khan ê “Kho-ha̍k” kî-khan huat-piáu in gián-kiù tsit-kiānn tāi-tsì kuí-nā tang ê sîng-kó.
佇𪜶的研究裡，Cohen佮Koenen專工研究鳥鼠仔體內的米色脂肪，因為鳥鼠仔米色脂肪細胞的功能佮人的咖啡色脂肪細胞的功能相倚，攏有誠旺盛的代謝產熱能力。佇咱胸坎的主動脈佮頷頸的頸動脈血管外膜的脂肪組織內，有誠濟咖啡色脂肪細胞佇咧。這號包佇咧血管外面的脂肪組織毋但予血管粗勇，閣會分泌hoo-lú-bóng控制血管筋肉的伸勼。往過捌有人發見因為大箍抑是老化致使脂肪組織內脂肪細胞組成的改變，會引起發炎佮高血壓，暗示佇咱動脈外膜的脂肪細胞種類對維持心血管的健康不止仔要緊。若準欠咖啡色脂肪會致到人大箍，Cohen佮Koenen憢疑鳥鼠仔的米色脂肪細胞佇脂肪組織內的量佮功能，凡勢就是維持心血管健康上大的關鍵。
Tī in ê gián-kiù ni̍h, Cohen kah Koenen tsuan-kang gián-kiù niáu-tshí-á thé-lāi ê bí-sik tsi-hông, in-uī niáu-tshí-á bí-sik tsi-hông sè-pau ê kong-lîng kah lâng ê ka-pi-sik tsi-hông sè-pau ê kong-lîng sio-uá, lóng ū tsiânn ōng-sīng ê tāi-siā sán-jia̍t lîng-li̍k. Tī lán hing-khám ê tsú-tōng-me̍h kah ām-kún ê kún-tōng-me̍h hueh-kńg guā-mo̍oh ê tsi-hông tsoo-tsit lāi, ū tsiânn tsē ka-pi-sik tsi-hông sè-pau tī leh. Tsit hō pau tī leh hueh-kńg guā-bīn ê tsi-hông tsoo-tsit m̄-nā hōo hueh-kńg tshoo-ióng, koh ē hun-pì hoo-lú-bóng khòng-tsè hueh-kńg kin-bah ê tshun-kiu. Íng-kuè bat ū lâng huat-kiàn in-uī tuā-khoo a̍h-sī nóo-huà tì-sú tsi-hông tsoo-tsit lāi tsi-hông sè-pau tsoo-sîng ê kái-piàn, ē ín-khí huat-iām kah ko-hueh-ap, àm-sī tī lán tōng-me̍h guā-mo̍oh ê tsi-hông sè-pau tsióng-luī tuì î-tshî sim-hueh-kńg ê kiān-khong put-tsí-á iàu-kín. Nā-tsún khiàm ka-pi-sik tsi-hông ē tì-kàu lâng tuā-khoo, Cohen kah Koenen giâu-gî niáu-tshí-á ê bí-sik tsi-hông sè-pau tī tsi-hông tsoo-tsit lāi ê liōng kah kong-lîng, huān-sè tiō sī î-tshî sim-hueh-kńg kiān-khong siōng tuā ê kuan-kiān.
Cohen佮Koenen觀察一種因為基因突變造成𪜶生成無米色脂肪的鳥鼠，發見這號鳥鼠𪜶血管外膜的脂肪組織有較濟白色脂肪，血壓較懸，閣有血管硬化佮纖維化的問題，若共原底健康的血管組織濫著白色脂肪細胞的分泌物，嘛會致到相𫝛的結果。利用RNA定序的技術，𪜶發見一款號做QSOX1的酵素會引發血管硬化佮高血壓。因為米色脂肪會壓制QSOX1的表現，米色脂肪若有欠缺，會造成鳥鼠仔體內的QSOX1衝懸，引起血管收縮佮硬化，就按呢心臟著愛較出力做工才通共血捒振動，造成血壓夯懸。若共鳥鼠仔的QSOX1基因鉸掉，就準講無米色脂肪佇咧，𪜶的血管嘛是規欉好好，無各樣。
Cohen kah Koenen kuan-tshat tsi̍t tsióng in-uī ki-in tu̍t-piàn tsō-sîng in senn-sîng bô bí-sik tsi-hông ê niáu-tshí, huat-kiàn tsit hō niáu-tshí in hueh-kńg guā-mo̍oh ê tsi-hông tsoo-tsit ū khah tsē pe̍h-sik tsi-hông, hueh-ap khah kuân, koh ū hueh-kńg ngē-huà kah tshiam-î-huà ê būn-tê, nā kā guân-té kiān-khong ê hueh-kńg tsoo-tsit lām tio̍h pe̍h-sik tsi-hông sè-pau ê hun-pì-mi̍h, mā ē tì-kàu sio-siāng ê kiat-kó. Lī-iōng RNA tīng-sū ê ki-su̍t, in huat-kiàn tsi̍t khuán hō-tsō QSOX1 ê kànn-sòo ē ín-huat hueh-kńg ngē-huà kah ko-hueh-ap. In-uī bí-sik tsi-hông ē ap-tsè QSOX1 ê piáu-hiān, bí-sik tsi-hông nā ū khiàm-khuat, ē tsō-sîng niáu-tshí-á thé-lāi ê QSOX1 tshìng kuân, ín-khí hueh-kńg siu-sok kah ngē-huà, tsiū-án-ne sim-tsōng tio̍h-ài khah tshut la̍t tsò kang tsiah thang kā hueh sak tín-tāng, tsō-sîng hueh-ap giâ kuân. Nā kā niáu-tshí-á ê QSOX1 ki-in ka-tiāu, tō tsún-kóng bô bí-sik tsi-hông tī-leh, in ê hueh-kńg mā sī kui-tsâng hó-hó, bô koh-iūnn.
Cohen佮Koenen的研究共咱開拆咖啡色脂肪保護咱心血管健康的分子機制，予咱加較了解高血壓的起因，咱嘛向望閣較濟科學有志會當做伙來研究，予咱有一工會使揣著通避免抑是治療心血管疾病的好藥方。
Cohen kah Koenen ê gián-kiù kā lán khui-thiah ka-pi-sik tsi-hông pó-hōo lán sim-hueh-kńg kiān-khong ê hun-tsú ki-tsè, hōo lán ke khah liáu-kái ko-hueh-ap ê khí-in, lán mā ǹg-bāng koh khah tsē kho-ha̍k iú-tsì ē-tàng tsò-hué lâi gián-kiù, hōo lán ū tsi̍t kang ē-sái tshuē-tio̍h thang pī-bián a̍h-sī tī-liâu sim-hueh-kńg tsi̍t-pēnn ê hó io̍h-hng.
參考資料 Tsham-khó tsu-liāu
Koenen M, Becher T, Pagano G, Del Gaudio I, Barrero JA, Montezano AC, Ruiz Ortiz J, Lin Z, Gómez-Banoy N, Amblard R, Schriever D, Kars ME, Rubinelli L, Halix SJ, Huang Cao ZF, Zeng X, Butler SD, Itan Y, Touyz RM, Di Lorenzo A, Cohen P. Ablation of Prdm16 and beige fat identity causes vascular remodeling and elevated blood pressure. Science. 2026 Jan 15;391(6782):306-313. doi: 10.1126/science.ady8644. Epub 2026 Jan 15. PMID: 41538429; PMCID: PMC13229588.