毋知逐家敢有這个經驗，考試的前一瞑，拚勢想欲共一大拖的課本內容記落來，讀了感覺放心矣走去睏，隔轉工起床煞共昨暝所讀的冊攏袂記得了了。若是早時仔讀的冊，到下晡抑是下暗，雖罔經過的時間攏仝款，毋過親像欲記較記會起來。人講睏眠會當予腦部歇睏，睏醒人嘛較有精神，照講應該是對記憶較有利才著，毋過實際上效果哪會煞顛倒反咧？

M̄ tsai ta̍k-ke kám ū tsit ê king-giām, khó-tshì ê tsîng tsi̍t mê, piànn-sè siūnn beh kā tsi̍t-tuā-thua ê khò-pún lāi-iông kì––lo̍h-lâi, tha̍k liáu kám-kak hòng-sim––ah tsáu khì khùn, keh-tńg-kang khí-tshn̂g suah kā tsa-mê sóo tha̍k ê tsheh lóng bē-kì-tsit liáu-liáu. Nā sī tsái-sî-á tha̍k ê tsheh, kàu ē-poo a̍h-sī ē-àm, sui-bóng king-kuè ê sî-kan lóng kāng-khuán, m̄-koh tshin-tshiūnn beh kì khah kì ē khì––lâi. Lâng kóng khùn-bîn ē-tàng hōo náu-pōo hioh-khùn, khùn-tshénn lâng mā khah ū tsing-sîn, tsiàu-kóng ìng-kai sī tuì kì-ik khah iú-lī tsiah tio̍h, m̄-koh si̍t-tsè-siōng hāu-kó ná ē suah tian-tò-píng––leh?

閱讀全文 是按怎咱睏醒了後定定會共昨暝才拄仔讀的冊袂記得？ Sī-án-tsuánn lán khùn-tshénn liáu-āu tiānn-tiānn ē kā tsa-mê tsiah tú-á tha̍k ê tsheh bē-kì-tsit? →

時代咧改變，社會嘛一直咧進步，現此時的少年朋友人人攏有一支巧手機仔，無論是步輦抑是駛車，來到一个新所在，只要共GPS拍予開，攏毋免煩惱會捎無方向。閣有較勥的是，GPS毋但會使共咱𤆬路nā-tiānn，伊甚至閣會共咱報路草，予咱知影通來走閃當咧窒車的路段，實在是不止仔利便。這馬的社會已經誠僫閣看見人那行那看地圖咧揣路矣。但是毋知各位出外時常倚靠GPS𤆬路的朋友，敢有感覺家己經沓沓仔咧失去認路的能力咧？設使若拄著手機仔無電抑是無訊號的狀況，恁敢有才調家己揣著路?

Sî-tāi teh kái-piàn, siā-huē mā it-ti̍t teh tsìn-pōo, hiān-tshú-sî ê siàu-liân-pîng-iú lâng-lâng lóng ū tsi̍t ki khiáu-tshiú-ki-á, bô-lūn sī pōo-lián a̍h-sī sái-tshia, lâi-kàu tsi̍t ê sin sóo-tsāi, tsí-iàu kā GPS phah hōo khui, lóng m̄-bián huân-ló ē sa-bô-hong-hiòng. Koh ū khah khiàng––ê sī, GPS m̄-nā ē-sái kā lán tshuā-lōo nā-tiānn, i sīm-tsì koh ē kā lán pò lōo-tsháu, hōo lán tsai-iánn thang lâi tsáu-siám tng-teh that-tshia ê lōo-tuānn, si̍t-tsāi sī put-tsí-á lī-piān. Tsit-má ê siā-huē í-king tsiânn oh koh khuànn-kìnn lâng ná kiânn ná khuànn tē-tôo teh tshuē lōo––ah. Tān-sī m̄-tsai kok-uī tshut-guā sî-siông uá-khò GPS tshuā lōo ê pîng-iú, kám ū kám-kak ka-tī í-king ta̍uh-ta̍uh-á teh sit-khì jīn-lōo ê lîng-li̍k––leh? Siat-sú nā tú-tio̍h tshiú-ki-á bô-tiān a̍h-sī bô sìn-hō ê tsōng-hóng, lín kám ū tsâi-tiāu ka-tī tshuē tio̍h lōo?

閱讀全文 你若向望欲有較好的頭殼，請毋通傷用GPS 來𤆬路 Lí nā ǹg-bāng beh ū khah hó ê thâu-khak, tshiánn m̄-thang siunn-iōng GPS lâi tshuā-lōo →

定定聽食薰的朋友咧哼：我已經試過幾若擺欲改薰，毋過就是無法度共伊改掉。會記得佇細漢的時陣，嘛捌聽過序大人抑是學校老師共咱提醒：食薰對身體有害，是一種歹習慣，歹習慣若養成了會誠僫改，所以千萬毋通食。無毋著，無人會否認食薰對身體的害，但就是改伊改袂掉。是按怎會按呢咧？其實愛食薰毋但是一項歹習慣爾爾，不時咧癮薰嘛會當算是一種病。就親像大多數的慢性病按呢，慢慢仔形成，紲落去就誠僫改。

Tiānn-tiānn thiann tsia̍h-hun ê pîng-iú teh hainn: guá í-king tshì-kuè kuí-nā-pái beh kái-hun, m̄-koh tō sī bô-huat-tōo kā i kái-tiāu.  Ē-kì––tsit tī sè-hàn ê sî-tsūn, mā bat thiann-kuè sī-tuā-lâng a̍h-sī ha̍k-hāu lāu-su kā lán thê-tshínn: tsia̍h-hun tuì sin-thé iú-hāi, sī tsi̍t tsióng pháinn-si̍p-kuàn, pháinn-si̍p-kuàn nā ióng-sîng liáu ē tsiânn oh kái, sóo-í tshian-bān m̄-thang tsia̍h. Bô-m̄-tio̍h, bô lâng ē hónn-jīn tsia̍h-hun tuì sin-thé ê hāi, tān tō sī kái i kái bē tiāu. Sī-án-tsuánn ē án-ne––leh? Kî-si̍t ài tsia̍h-hun m̄-nā sī tsi̍t-hāng pháinn-si̍p-kuàn niā-niā, put-sî teh giàn-hun mā ē-tàng sǹg-sī tsi̍t tsióng pēnn. Tō tshin-tshiūnn tuā-to-sòo ê bān-sìng pēnn án-ne, bān-bān-á hîng-sîng, suà––lo̍k-khì tō tsiânn oh kái.

閱讀全文 是按怎薰會遮歹改？Sī-án-tsuánn hun ē tsiah pháinn kái? →

毋知逐家敢有佇社會新聞看過，啉酒醉的人駛車去予警察仔閘落來，毋知是為著欲逃避酒測抑是按怎，紲起痟做足濟無正經的代誌。事後退酒了後，紲攏否認講𪜶昨暗有做過遐的痟代誌，有講過遐的痟話。放影片予𪜶看，定定攏共𪜶驚一趒，講𪜶完全無印象有這層代誌。大部份的人攏認為𪜶是咧假仙，毋過若對神經科學的角度來看，𪜶確實是袂記得家己啉酒啉甲馬西馬西的時所做的代誌。是按怎會按呢咧？這主要是酒精造成的。過量的酒精予人的頭殼失去形成新記憶的能力。

M̄-tsai ta̍k-ke kám ū tī siā-huē-sin-bûn khuànn––kuè, lim-tsiú-tsuì ê lâng sái-tshia khì hōo kíng-tshat-á tsa̍h––lo̍h-lâi, m̄-tsai sī uī-tio̍h beh tô-pī tsiú-tshik iah-sī án-tsuánn, suà khí-siáu tsò tsiok-tsē bô-tsìng-king ê tāi-tsì. Sū-āu thè-tsiú liáu-āu, suà lóng hónn-jīn kóng in tsa-àm ū tsò kuè hia––ê siáu-tāi-tsì, ū kóng kuè hia––ê siáu-uē. Pàng iánn-phìnn hōo in khuànn, tiānn-tiānn lóng kā in kiann tsi̍t tiô, kóng in uân-tsuân bô ìn-siōng ū tsit-tsân tāi-tsì. Tuā-pōo-hūn ê lâng lóng jīn-uî in sī leh ké-sian, m̄-koh nā uì sîn-king-kho-ha̍k ê kak-tōo lâi khuànn, in khak-si̍t sī bē-kì-tsit ka-tī lim-tsiú lim kah má-se-má-se ê sî sóo tsò ê tāi-tsì. Sī-án-tsuánn ē án-ne––leh? Tse tsú-iàu sī tsiú-tsing tsō-sîng––ê. Kuè-liōng ê tsiú-tsing hōo lâng ê thâu-khak sit-khì hîng-sîng sin kì-ik ê lîng-li̍k.

閱讀全文 是按怎人退酒了後定定會袂記得啉酒醉的時所做的代誌？Sī-án-tsuánn lâng thè-tsiú liáu-āu tiānn-tiānn ē bē-kì-tsit lim-tsiú-tsuì ê sî sóo tsò ê tāi-tsì? →

定定聽人講：頭殼愛較捷用咧，一般人干焦用著10%的腦力爾爾，實在真拍損。無毋著，無人會否認頭殼愈用會愈好。毋過，咱人敢干焦用著10%的腦力？若真正是按呢，賰的 90% 是用佇佗位？這个10% 理論到底是著抑是毋著？

Tiānn-tiānn thiann lâng kóng: thâu-khak ài khah tsia̍p iōng––leh, it-puann-lâng kan-na iōng tio̍h pah-hun-tsi-tsa̍p ê náu-li̍k niā-niā, si̍t-tsāi tsin phah-sńg. Bô m̄-tio̍h, bô lâng ē hónn-jīn thâu-khak lú iōng ē lú hó. M̄-koh, lán lâng kám kan-na iōng tio̍h pah-hun-tsi-tsa̍p ê náu-li̍k? Nā tsin-tsiànn sī án-ne, tshun––ê pah-hun-tsi-káu-tsa̍p sī iōng tī tó-uī? Tsit ê pah-hun-tsi-tsa̍p lí-lūn tàu-té sī tio̍h a̍h-sī m̄-tio̍h?

閱讀全文 咱人敢干焦用著10%的腦力? Lán lâng kám kan-na iōng-tio̍h pah-hun-tsi-tsa̍p ê náu-li̍k？ →