全文朗讀 Tsuân-bûn lóng-tho̍k
瑞典的皇家科學院宣布共舊年的Nobel生理醫學獎，頒發予日本學者 Shimon Sakaguchi以及兩位美國學者Mary E. Brunkow佮Fred Ramsdell。皇家科學院呵咾𪜶三位科學sia̋n-pái共免疫系統的「周邊免疫耐受性」的運作機制稽考甲清清楚楚，毋但予咱對免疫系統的運作有加較深的認捌，閣通幫贊醫學界開發針對癌症佮自體免疫疾病的新藥方。
Suī-tián ê hông-ka kho-ha̍k-īnn suan-pòo kā kū-nî ê Nobel sing-lí-i-ha̍k tsióng, pan-huat hōo Ji̍t-pún ha̍k-tsiá Shimon Sakaguchi í-ki̍p nn̄g-uī Bí-kok ha̍k-tsiá Mary E. Brunkow kah Fred Ramsdell. Hông-ka kho-ha̍k-īnn o-ló in sann-uī kho-ha̍k sia̋n-pái kā bián-i̍k-hē-thóng ê “tsiu-pinn bián-i̍k nāi-siū-sìng” ê ūn-tsok ki-tsè khe-khó kah tshing-tshing-tshó-tshó, m̄-nā hōo lán tuì bián-i̍k-hē-thóng ê ūn-tsok ū ke khah tshim ê jīn-bat, koh thang pang-tsān i-ha̍k-kài khai-huat tsiam-tuì gâm-tsìng kap tsū-thé-bián-i̍k-tsi̍t-pēnn ê sin io̍h-hng.
免疫系統是咱身體的安全部隊，佇咱人的一生中，伊時時刻刻攏咧共咱保護，避免外界滿滿是的微生物抑是體內因為基因突變生成的癌細胞對咱的傷害。經過幾若百萬年的演化，免疫系統已經有法度消滅抑是壓制大多數入佇咱身軀作怪的病毒、細菌佮其他的微生物，若無，咱人斷斷無才調生存。不而過，俗語講「水能載舟，亦能覆舟」，這个勇健的免疫系統厲害罔厲害，若是無細膩走精去，共家己人當做是對敵咧拍，對咱身體就是一个大災厄。所致，為著避免咱這台免疫戰車衝傷雄致到傷著家己人，咱身體定著愛有共約束的機制佇咧，就若親像車的擋仔仝款，科學界共這號機制號名做「免疫耐受性」。
Bián-i̍k-hē-thóng sī lán sin-thé ê an-tsuân-pōo-tuī, tī lán-lâng ê it-sing tiong, i sî-sî-khik-khik lóng teh kā lán pó-hōo, pī-bián guā-kài muá-muá-sī ê bî-sing-bu̍t a̍h-sī thé-lāi in-uī ki-in tu̍t-piàn senn-sîng ê gâm-sè-pau tuì lán ê siong-hāi. King-kuè kuí-nā pah-bān nî ê ián-huà, bián-i̍k-hē-thóng í-king ū-huat-tōo siau-bia̍t a̍h-sī ap-tsè tuā-to-sòo ji̍p-tī lán sing-khu tsok-kuài ê pēnn-to̍k, sè-khún kah kî-tha ê bî-sing-bu̍t, nā-bô, lán-lâng tuàn-tuàn bô-tsâi-tiāu sing-tsûn. Put-jî-kò, sio̍k-gí kóng “suí lîng tsài tsiu, i̍k lîng hok tsiu”, tsit ê ióng-kiānn ê bián-i̍k-hē-thóng lī-hāi bóng lī-hāi, nā-sī bô-sè-jī tsáu-tsing khì, kā ka-tī lâng tòng-tsò sī tuì-ti̍k leh phah, tuì lán sin-thé tō-sī tsi̍t ê tuā tsai-eh. Sóo-tì, uī-tio̍h pī-bián lán tsit tâi bián-i̍k tsiàn-tshia tshiong siunn hiông tì-kàu siong-tio̍h ka-tī lâng, lán sin-thé tiānn-tio̍h ài ū kā iok-sok ê ki-tsè tī leh, tō ná-tshin-tshiūnn tshia ê tòng-á kāng-khuán, kho-ha̍k-kài kā tsit-hō ki-tsè hō-miâ tsò “bián-i̍k-nāi-siū-sìng”.
免疫耐受性是啥物 Bián-i̍k nāi-siū-sìng sī siánn-mi̍h
免疫耐受源自免疫系統的專一性免疫反應，專一性免疫反應有分做由分泌抗體的B細胞主導的體疫免疫，佮會清除受病毒感染細胞的T細胞負責的細胞免疫兩類。根據徛踮細胞表面的卵白質受體種類，T細胞閣會使分做帶CD4受體的輔助T細胞，佮帶CD8受體的殺手T細胞。毋管是佗一款T細胞，𪜶表面攏有會認特定抗原的感受器，這號感受器若佮合伊結構的抗原相結合，會予這个T細胞受刺激,引起免疫反應。免疫耐受的概念是：假使T細胞若遇著家己細胞（自體）的抗原，就算抗原的結構有略仔合伊的感受器，伊嘛會忍咧袂插伊；若準是外來的物，就會設法共伊消滅。
Bián-i̍k-nāi-siū guân-tsū bián-i̍k-hē-thóng ê tsuan-it-sìng bián-i̍k-huán-ìng, tsuan-it-sìng bián-i̍k-huán-ìng ū hun-tsò iû hun-pì khòng-thé ê B sè-pau tsú-tō ê thé-i̍k-bián-i̍k, kah ē tshing-tû siū pēnn-to̍k kám-jiám sè-pau ê T sè-pau hū-tsik ê sè-pau-bián-i̍k nn̄g-luī. Kin-kì khiā-tiàm sè-pau piáu-bīn ê nn̄g-pe̍h-tsit siū-thé tsióng-luī, T sè-pau koh ē-sái hun-tsò tài CD4 siū-thé ê hú-tsōo T sè-pau, kah tài CD8 siū-thé ê sat-tshiú T sè-pau. M̄-kuán sī tó tsi̍t khuán sè-pau, in piáu-bīn lóng ū ē jīn ti̍k-tīng khòng-guân ê kám-siū-khì, tsit hō kám-siū-khì nā kah ha̍h i kiat-kòo ê khòng-guân sio-kiat-ha̍p, ē hōo tsit ê T sè-pau siū tshì-kik, ín-khí bián-i̍k-huán-ìng. Bián-i̍k-nāi-siū ê khài-liām sī: ká-sú T sè-pau nā gū-tio̍h ka-tī sè-pau (tsū-thé) ê khòng-guân, tō-sǹg khòng-guân ê kiat-kòo ū lio̍k-á ha̍h i ê kám-siū-khì, i mā ē lún––leh bē tshap i；nā-tsún sī guā-lâi ê mi̍h, tō ē siat-huat kā i siau-bia̍t.
免疫耐受有分做兩款，第一款是佇T細胞發育的胸腺進行，咱共伊號名做「中樞免疫耐受」。佇胸腺大漢的過程中，逐个T細胞攏會接觸著千千萬萬咱家己細胞的抗原，T細胞頂面的感受器若有合任何自體的抗原，這个T細胞著愛共擲㧒捔，毋通予伊繼續發展落去，賰的干焦會認外來抗原的T細胞才通發育大漢，紲落去進入血液佮淋巴循環系統巡邏保護身體。所致，中樞免疫耐受的篩選予干焦認外來抗原的T細胞留落來，毋過這个篩選機制無法度百分百的十全，總是會無張池予一寡歹細胞落勾去，若準無別項機制共𪜶擋咧，放予𪜶烏白衝，恐驚會引起自體免疫疾病。為著避免這款災厄，免疫系統的確愛有第二線的監控機制才會用得。
Bián-i̍k-nāi-siū ū hun tsò nn̄g khuán, tē-it-khuán sī tī T sè-pau huat-io̍k ê hing-suànn tsìn-hîng, lán kā i hō-miâ tsò “tiong-tshu-bián-i̍k-nāi-siū”. Tī hing-suànn tuā-hàn ê kuè-thîng tiong, ta̍k ê T sè-pau lóng ē tsiap-tshiok tio̍h tshian-tshian-bān-bān lán ka-tī sè-pau ê khòng-guân, T sè-pau tíng-bīn ê kám-siū-khì nā-ū ha̍h jīm-hô tsū-thé ê khòng-guân, tsit ê T sè-pau tio̍h ài kā tàn-hiat-ka̍k, m̄-thang hōo i kè-sio̍k huat-tián––lo̍h-khì, tshun ê kan-nā ē jīn guā-lâi khòng-guân ê T sè-pau tsiah thang huat-io̍k tuā-hàn, suà––lo̍h-khì tsìn-ji̍p hueh-i̍k kah lîm-pa sûn-khuân-hē-thóng sûn-lô pó-hōo sin-thé. Sóo-tì, tiong-tshu bián-i̍k-nāi-siū ê thai-suán hōo kan-nā jīn guā-lâi khòng-guân ê T sè-pau lâu––lo̍h-lâi, m̄-koh tsit ê thai-suán ki-tsè bô-huat-tōo pah-hun-pah ê tsa̍p-tsn̂g, tsóng-sī ē bô-tiunn-tî hōo tsi̍t-kuá pháinn-sè-pau làu-kau-khì, nā-tsún bô pa̍t-hāng ki-tsè kā in tòng––leh, pàng hōo in oo-pe̍h tshiong, khióng-kiann ē ín-khí tsū-thé-bián-i̍k-tsi̍t-pēnn. Uī-tio̍h pī-bián tsit khuán tsai-eh, bián-i̍k-hē-thóng tik-khak ài ū tē-jī-suànn ê kàm-khòng ki-tsè tsiah ē-īng––tit.
這个第二線的監控機制就是這改Nobel生理醫學獎著獎者的貢獻，主要是由調節性T細胞來完成。下跤咱做伙來探討：
Tsit ê tē-jī-suànn ê kàm-khòng ki-tsè tō-sī tsit kái Nobel sing-lí i-ha̍k tsióng tio̍h-tsióng-tsiá ê kòng-hiàn, tsú-iàu sī iû tiâu-tsiat-sìng T sè-pau lâi uân-sîng. Ē-kha lán tsò-hué lâi thàm-thó:
早佇80年代，就捌有人推論講除了倚靠中樞免疫耐受揀出無害閣有路用的T細胞掠外，閣有一款會壓制殺手T細胞毒殺作用的「抑制性T細胞」佇周邊咧監控，確保殺手細胞袂去傷著家己人。毋過因為彼當時的分子生物技術無蓋先進，無人有才調揣著這个幕後藏鏡人的廬山真面目，閣加上彼陣有一寡研究論文的結論傷過膨風，原底的理論終其尾予人推翻，致使這个「抑制性T細胞」的概念就按呢予科學界挕捒，無人想欲閣去共稽考。
Tsá tī 80 nî-tāi, tō bat ū lâng thui-lūn kóng tû-liáu uá-khò tiong-tshu bián-i̍k-nāi-siū kíng-tshut bô-hāi koh ū lōo-īng ê T sè-pau lia̍h-guā, koh ū tsi̍t khuán ē ap-tsè sat-tshiú T sè-pau to̍k-sat-tsok-iōng ê “ah-tsè-sìng T sè-pau” tī tsiu-pinn leh kàm-khòng, khak-pó sat-tshiú-sè-pau bē khì siong-tio̍h ka-tī lâng. M̄-koh in-uī hit-tong-sî ê hun-tsú sing-bu̍t ki-su̍t bô kài sian-tsìn, bô-lâng ū tsâi-tiāu tshuē tio̍h tsit ê bōo-āu tsông-kiànn-jîn ê lôo-san tsin-bīn-bo̍k, koh ka-siōng hit-tsūn ū tsi̍t-kuá gián-kiù lūn-bûn ê kiat-lūn siunn kuè phòng-hong, guân-té ê lí-lūn tsiong-kî-bué hōo-lâng thui-huan, tì-sú tsit ê “ah-tsè-sìng T sè-pau” ê khài-liām tsiū-án-ne hōo kho-ha̍k-kài hìnn-sak, bô-lâng siūnn beh koh khì kā khe-khó.
Shimon Sakaguchi的貢獻 Shimon Sakaguchi ê kòng-hiàn
Shimon Sakaguchi是日本的免疫學者，早佇1977年拄入佇愛知縣癌症中心做研究的時就對自體免疫疾病有誠大的興趣。雖罔彼陣的主流免疫學界共抑制性T細胞的概念擲入糞埽桶，並無拍化Sakaguchi對這項議題的研究熱情。伊佇癌症中心服務的期間，有一个誠怪奇的實驗結果予伊感覺誠心適，伊的同事佇咧研究胸腺對T細胞發育的重要性的時陣，捌共拄仔生出來的鳥鼠仔囝的胸腺切除，原底按算講按呢做會致使鳥鼠仔囝的免疫系統虛荏，無疑悟煞觀察著一件足趣味的代誌，若共拄出世三工的鳥鼠仔囝的胸腺開刀切除，紲落去伊的免疫系統會失控，開始攻擊家己的細胞。既然胸腺是T細胞發育大漢的所在，共伊切除就袂輸共猶未發展好勢的T細胞移除，這無的確就是鳥鼠仔著自體免疫病的因端。為著證明這个論點，Sakaguchi對遺傳背景相𫝛的健康鳥鼠仔體內分離出好的T細胞，共遮的T細胞注射入去胸腺hông切除的鳥鼠仔了後，發見鳥鼠仔就攏活甲好勢好勢，攏無著自體免疫疾病。Sakaguchi認為對健康鳥鼠分離出來的T細胞群內底，的確有某種毋知名的T細胞咧扮演親像保全的角色，避免殺手T細胞傷害著家己的細胞。
Shimon Sakaguchi sī Ji̍t-pún ê bián-i̍k-ha̍k-tsiá, tsá-tī 1977 nî tú ji̍p-tī Ài-ti-kuān gâm-tsìng tiong-sim tsò-gián-kiù ê sî tō tuì tsū-thé-bián-i̍k-tsi̍t-pēnn ū tsiânn tuā ê hìng-tshù. Sui-bóng hit-tang-tsūn ê tsú-liû bián-i̍k-ha̍k-kài kā ah-tsè-sìng T sè-pau ê khài-liām tàn ji̍p pùn-sò-tháng, pīng bô phah hua Sakaguchi tuì tsit-hāng gī-tê ê gián-kiù jia̍t-tsîng. I tī gâm-tsìng tiong-sim ho̍k-bū ê kî-kan, ū tsi̍t ê tsiânn kuài-kî ê si̍t-giām kiat-kó hōo i kám-kak tsiânn sim-sik, i ê tông-sū tī leh gián-kiù hing-suànn tuì T sè-pau huat-io̍k ê tiōng-iàu-sìng ê sî-tsūn, bat kā tú-á senn––tshut-lâi ê niáu-tshí-á kiánn ê hing-suànn tshiat-tû, guân-té án-sǹg kóng án-ne tsò ē tì-sú niáu-tshí-á kiánn ê bián-i̍k-hē-thóng hi-lám, bô-gî-ngōo suah kuan-tshat-tio̍h tsi̍t-kiānn tsiok tshù-bī ê tāi-tsì, nā kā tú tshut-sì sann-kang ê niáu-tshí-á kiánn ê hing-suànn khui-to tshiat-tû, suà––lo̍h-khì i ê bián-i̍k-hē-thóng ē sit-khòng, khai-sí kong-kik ka-tī ê sè-pau. Kì-jiân hing-suànn sī T sè-pau huat-io̍k tuā-hàn ê sóo-tsāi, kā i tshiat-tû tō bē-su kā iáu-buē huat-tián hó-sè ê T sè-pau î-tû, tse bô-tik-khak tō-sī niáu-tshí-á tio̍h tsū-thé-bián-i̍k pēnn ê in-tuann. Uī-tio̍h tsìng-bîng tsit ê lūn-tiám, Sakaguchi uì uî-thuân puē-kíng sio-siāng ê kiān-khong niáu-tshí-á thé-lāi hun-lî tshut hó ê T sè-pau, kā tsia-ê T sè-pau tsù-siā ji̍p-khì hing-suànn hông tshiat-tû ê niáu-tshí-á liáu-āu, huat-kiàn niáu-tshí-á tō lóng ua̍h-kah hó-sè-hó-sè, lóng bô tio̍h tsū-thé-bián-i̍k-tsi̍t-pēnn. Sakaguchi jīn-uî uì kiān-khong niáu-tshí hun-lî tshut-lâi ê T sè-pau kûn lāi-té, tik-khak ū bóo-tsióng m̄-tsai-miâ ê T sè-pau teh pān-ián tshin-tshiūnn pó-tsuân ê kak-sik, pī-bián sat-tshiú T sè-pau siong-hāi tio̍h ka-tī ê sè-pau.
紲落去經過十五冬的稽考，Sakaguchi佇1995年正式發表伊的研究成果，一種事後予人號名做「調節性T細胞」的T細胞，就是這个幕後的保全。這个表面帶有CD4佮CD25受體的T細胞，交殺手T細胞仝款嘛會踮身體四界巡邏，若拄著殺手細胞予家己細胞的抗原刺激著，會緊共伊擋咧避免伊拍家己的細胞，確保免疫系統對自體抗原的耐受性。
Suà––lo̍h-khì king-kuè tsa̍p-gōo tang ê khe-khó, Sakaguchi tī 1995 nî tsìng-sik huat-piáu i ê gián-kiù sîng-kó, tsi̍t tsióng sū-āu hōo lâng hō-miâ tsò “tiâu-tsiat sìng T sè-pau” ê T sè-pau, tiō-sī tsit ê bōo-āu ê pó-tsuân. Tsit ê piáu-bīn tài ū CD4 kah CD25 siū-thé ê T sè-pau, kiau sat-tshiú T sè-pau kāng-khuán mā ē tiàm sin-thé sì-kè sûn-lô, nā tú-tio̍h sat-tshiú-sè-pau hōo ka-tī sè-pau ê khòng-guân tshì-kik tio̍h, ē kín kā i tòng––leh pī-bián i phah ka-tī ê sè-pau, khak-pó bián-i̍k-hē-thóng tuì tsū-thé khòng-guân ê nāi-siū-sìng.
發現Foxp3基因佮周邊免疫耐受的分子密碼 Huat-hiān Foxp3 ki-in kah tsiu-pinn bián-i̍k-nāi-siū ê hun-tsú-bi̍t-bé
雖罔Sakaguchi已經共逐家清楚紹介調節性T細胞的功用，有不止仔濟的學者猶原是半信半疑，認為猶閣無夠額的證據通證明伊的存在，就若親像一幅欠彼片關鍵的鬥圖片的鬥圖，予人猶是看甲霧嗄嗄。一直到Mary E. Brunkow以及Fred Ramsdell的研究貢獻，才共這幅猶未完成的鬥圖鬥好勢。
Sui-bóng Sakaguchi í-king kā ta̍k-ke tshing-tshó siāu-kài tiâu-tsiat-sìng T sè-pau ê kong-iōng, ū put-tsí-á tsē ê ha̍k-tsiá iû-guân sī puàn-sìn-puàn-gî, jīn-uî iáu-koh bô kàu gia̍h ê tsìng-kù thang tsìng-bîng i ê tsûn-tsāi, tō ná-tshin-tshiūnn tsi̍t pak khiàm hit phìnn kuan-kiān ê tàu-tôo-phìnn ê tàu-tôo, hōo lâng iáu-sī khuànn kah bū-sà-sà. It-ti̍t kàu Mary E. Brunkow í-ki̍p Fred Ramsdell ê gián-kiù kòng-hiàn, tsiah kā tsit pak iáu-buē uân-sîng ê tàu-tôo tàu hó-sè.
佮Sakaguchi仝款，佇美國的生物科技公司服務的Brunkow佮Ramsdell嘛對自體免疫有大興趣，𪜶兩人的成就主要源自研究一種號做scurfy的突變鳥鼠，這種鳥鼠因為某種徛佇X染色體的基因發生突變，造成公的鳥鼠仔囝的T細胞生傷濟，致到規身軀攏出現嚴重的組織損傷，通常袂活過三四禮拜。𪜶兩人認為這个神祕的基因有通予𪜶了解濟濟自體免疫疾病的致病機制，決心欲來共伊好好仔搜揣出來。毋過佇彼當時的90年代，分子生物技術才拄起鼓無偌久，欲佇遮爾仔大的X染色體裡走揣一个毋知影覕佇佗位的基因，就敢若海底摸針咧，一般人一下聽著可能連鞭就火化去矣，閣免講蹽落去做。
Kah Sakaguchi kāng-khuán, tī Bí-kok ê sing-bu̍t kho-ki kong-si ho̍k-bū ê Brunkow kah Ramsdell mā tuì tsū-thé bián-i̍k ū tuā hìng-tshù, in nn̄g-lâng ê sîng-tsiū tsú-iàu guân-tsū gián-kiù tsi̍t tsióng hō-tsò scurfy ê tu̍t-piàn niáu-tshí, tsit tsióng niáu-tshí in-uī bóo-tsióng khiā tī X ní-sik-thé ê ki-in huat-sing tu̍t-piàn, tsō-sîng kang ê niáu-tshí-á kiánn ê T sè-pau senn siunn tsē, tì-kàu kui sing-khu lóng tshut-hiān giâm-tiōng ê tsoo-tsit sún-siong, thong-siông bē ua̍h kuè sann-sì lé-pài. In nn̄g lâng jīn-uî tsit ê sîn-pì ê ki-in ū thang hō in liáu-kái tsē-tsē tsū-thé-bián-i̍k tsi̍t-pēnn ê tì-pēnn-ki-tsè, kuat-sim beh lâi kā i hó-hó-á tshiau-tshuē––tshut-lâi. M̄-koh tī hit-tong-sî ê kiú-khòng nî-tāi, hun-tsú-sing-bu̍t-ki-su̍t tsiah tú khí-kóo bô-guā-kú, beh tī tsiah-nī-á tuā ê X ní-sik-thé ni̍h tsáu-tshuē tsi̍t ê m̄-tsai-iánn bih tī tó-uī ê ki-in, tō kánn-ná hái-té bong-tsiam leh, it-puann-lâng tsi̍t-ē thiann––tio̍h khó-lîng liâm-mi tō hué hua––khì––ah, koh bián-kóng liâu-lo̍h-khì tsò.
好佳哉，人講「有心拍鐵，鐵成針」，𪜶兩位學者倚靠有限的生物技術佮無限的熱情，經過規十冬佇實驗室無瞑無日的稽考，終其尾予𪜶佇2001年揣著這个號做FoxP3的基因，伊的突變就是致到scurfy鳥鼠著自體免疫疾病的原因。佇𪜶發表𪜶的研究成果的兩冬以後，Sakaguchi佮其他的科學家嘛相連紲證明FoxP3就是主導調節性T細胞發育的關鍵基因，Fox3若害去，就無調節性T細胞生成，致使人著自體免疫疾病。
Hó-ka-tsài, lâng kóng “ū sim phah thih, thih sîng tsiam” in nn̄g-uī ha̍k-tsiá uá-khò iú-hān ê sing-bu̍t-ki-su̍t kah bû-hān ê jia̍t-tsîng, king-kuè kui-tsa̍p-tang tī si̍t-giām-sik bô-mê-bô-ji̍t ê khe-khó, tsiong-kî-bué hōo in tī 2001 nî tshuē-tio̍h tsit ê hō-tsò FoxP3 ê ki-in, i ê tu̍t-piàn tō-sī tì-kàu scurfy niáu-tshí tio̍h tsū-thé-bián-i̍k tsi̍t-pēnn ê guân-in. Tī in huat-piáu in ê gián-kiù sîng-kó ê nn̄g-tang í-āu, Sakaguchi kah kî-tha ê kho-ha̍k-ka mā sio-liân-suà tsìng-bîng FoxP3 tiō-sī tsú-tō tiâu-tsiat-sìng T sè-pau huat-io̍k ê kuan-kiān ki-in, FoxP3 nā hāi––khì, tō bô tiâu-tsiat-sìng T sè-pau senn-sîng, tì-sú lâng tio̍h tsū-thé-bián-i̍k tsi̍t-pēnn.
佇醫學上的貢獻 Tī i-ha̍k siōng ê kòng-hiàn
調節性T細胞是周邊免疫耐受的主角，伊毋但確保殺手T細胞袂傷著家己人，嘛會佇入侵者hông拍敗了後，共免疫反應壓落來，予身體的功能恢復正常。不而過，伊這个功用煞予奸巧的腫瘤細胞利用來走閃免疫系統的攻擊，有醫生佇病人身軀頂觀察著腫瘤會共濟濟調節性T細胞箍倚來伊的邊仔，成做一个保護網，致使殺手細胞袂共伊拍。欲按怎設法共這陣予腫瘤迷惑的調節性T細胞去邪歸正，拍破這个保護網，是現此時濟濟癌症免疫療法研究人員拍拚的目標。開發癌症療法掠外，欲怎樣強化調節性T細胞的功能來避免自體免疫疾病，抑是講壓制佇器官移植的時定定拄著的免疫排斥問題，嘛是誠烘的醫學研究議題，唌真濟人相爭咧做，向望有一工通揣著治療的好藥方。
Tiâu-tsiat-sìng T sè-pau sī tsiu-pinn bián-i̍k nāi-siū ê tsú-kak, i m̄-nā khak-pó sat-tshiú T sè-pau bē siong-tio̍h ka-tī-lâng, mā ē tī ji̍p-tshim-tsiá hông phah pāi liáu-āu, kā bián-i̍k-huán-ìng ah––lo̍h-lâi, hōo sin-thé ê kong-lîng khue-ho̍k tsìng-siông. Put-jî-kò, i tsit ê kong-iōng suah hōo kan-khiáu ê tsíng-liû-sè-pau lī-iōng lâi tsáu-siám bián-i̍k-hē-thóng ê kong-kik, ū i-sing tī pēnn-lâng sing-khu tíng kuan-tshat tio̍h tsíng-liû ē kā tsē-tsē tiâu-tsiat-sìng T sè-pau khoo-uá lâi i ê pinn-á, tsiânn-tsò tsi̍t ê pó-hōo-bāng, tì-sú sat-tshiú-sè-pau bē kā i phah. Beh án-tsuánn siat-huat kā tsit tīn hōo tsíng-liû bê-hi̍k ê tiâu-tsiat-sìng T sè-pau khì-siâ-kui-tsìng, phah phuà tsit ê pó-hōo-bāng, sī hiān-tshú-sî tsē-tsē gâm-tsìng bián-i̍k-liâu-huat gián-kiù jîn-uân phah-piànn ê bo̍k-phiau. Khai-huat gâm-tsìng liâu-huat lia̍h-guā, beh tsuánn-iūnn kiông-huà tiâu-tsiat-sìng T sè-pau ê kong-lîng thang lâi pī-bián tsū-thé-bián-i̍k tsi̍t-pēnn, a̍h-sī kóng ap-tsè tī khì-kuan î-si̍t ê sî tiānn-tiānn tú-tio̍h ê bián-i̍k-pâi-thik būn-tê, mā-sī tsiânn hang ê i-ha̍k gián-kiù gī-tê, siânn tsin tsē lâng sio-tsinn leh tsò, ǹg-bāng ū tsi̍t-kang thang tshuē-tio̍h tī-liâu ê hó io̍h-hng.