全文朗讀 Tsuân-bûn lóng-tho̍k

台灣因為國家細人口濟，人人慣勢駛車和騎oo-tóo-bái，而且有超過七成的發電是源自火力發電，定定予西半部各大城市，尤其是中南部的空氣品質䆀，幼浮塗粉指數（PM 2.5）懸，出門常常愛掛喙掩，徛佇遠遠的大樓抑是東爿的中央山脈嘛看袂清。欲按怎解決空氣汙染的問題，佇舊年縣市長的選舉中，也成做候選人重大的政見。除了政府鼓吹開發綠電，也就是再生能源，來取代燒塗炭抑是石油的火力發電以外，咱敢閣有其他的方法，會當改善空氣的品質咧？

Tâi-uân in-uī kok-ka sè jîn-kháu tsē, lâng-lâng kuàn-sì sái-tshia hām khiâ-oo-tóo-bái, jî-tshiánn ū tshiau-kuè tshit-siânn ê huat-tiān sī guân-tsū hué-li̍k-huat-tiān, tiānn-tiānn hōo sai-puànn-pōo kok tuā siânn-tshī, iû-kî sī tiong-lâm-pōo ê khong-khì phín-tsit bái, iù-phû-thôo-hún tsí-sòo (PM 2.5) kuân, tshut-mn̂g siông-siông ài kuà tshuì-am, khiā tī hn̄g-hn̄g ê tuā-lâu a̍h-sī tang-pîng ê Tiong-iong-suann-me̍h mā khuànn bē tshing. Beh án-tsuánn kái-kuat khong-khì u-jiám ê būn-tê, tī kū-nî kuān-tshī-tiúnn ê suán-kí tiong, iā tsiânn-tsò hāu-suán-jîn tiōng-tāi ê tsìng-kiàn. Tû-liáu tsìng-hú kóo-tshui khai-huat li̍k-tiān, iā-tō-sī tsài-sing-lîng-guân, lâi tshú-tāi sio thôo-thuànn a̍h-sī tsio̍h-iû ê hué-li̍k-huat-tiān í-guā, lán kám koh ū kî-tha ê hong-huat, ē-tàng kái-siān khong-khì ê phín-tsit––leh?

樹仔會使吸收幼浮塗粉 Tshiū-á ē-sái khip-siu iù-phû-thôo-hún

若講著樹木的利益，我想逐家頭一个想著的，就是伊會進行光合作用，吸收空氣中的二氧化碳，防止地球發燒。凡勢嘛有人聽過學者講過，佇大城市起公園種樹仔，會使幫贊都市降溫，抑制所謂的「熱島效應」。毋過，敢有人聽過樹仔的樹葉會使吸收幼浮塗粉，淨化空氣，就敢若空氣清淨機仝款？

Nā kóng-tio̍h tshiū-ba̍k ê lī-ik, guá siūnn ta̍k-ke thâu-tsi̍t-ê siūnn––tio̍h ê, tō-sī i ē tsìn-hîng kong-ha̍p-tsok-iōng, khip-siu khong-khì tiong ê jī-ióng-huà-thuànn, hông-tsí tē-kiû-huat-sio. Huān-sè mā ū lâng thiann-kuè ha̍k-tsiá kóng––kuè, tī tuā siânn-tshī khí kong-hn̂g tsìng tshiū-á, ē-sái pang-tsān too-tshī kàng-un, ah-tsè sóo-uī ê “jia̍t-tó-hāu-ìng”. M̄-koh, kám ū lâng thiann-kuè tshiū-á ê tshiū-hio̍h ē-sái khip-siu iù-phû-thôo-hún, tsīng-huà khong-khì, tō kánn-ná khong-khì tshing-tsīng-ki kāng-khuán?

今年五月，英國Lancaster 大學的Barbara Maher教授，針對無仝樹仔的樹葉吸收空氣中幼浮塗粉的能力做分析。佇風洞實驗裡，伊共車輛煙筒管排出來的垃圾氣歕向九種無仝種類的樹仔，紲落去觀察流過樹仔的廢氣中，幼浮塗粉的濃度變化。伊發見著銀樺樹、紅杉仔和接骨丹三種樹仔，會使共超過70%的幼浮塗粉吸收。用電子顯微鏡斟酌共看，這三種樹仔的樹葉仔黏誠濟幼浮塗粉，而且葉仔表面若愈粗抑是愈濟幼毛，會使黏愈濟塗粉粒仔。Maher共《The Scientist》雜誌講：佇大路邊種這三種樹仔，會使共各種交通工具所排放的烏煙內底的幼浮塗粉吸收，對人的健康會有大利益。

Kin-nî gōo––gue̍h, Ing-kok Lancaster tāi-ha̍k ê Barbara Maher kàu-siū, tsiam-tuì bô-kāng tshiū-á ê tshiū-hio̍h khip-siu khong-khì tiong iù-phû-thôo-hún ê lîng-li̍k tsò hun-sik. Tī hong-tōng si̍t-giām tiong, i kā tshia-liōng ian-tâng-kóng pâi––tshut-lâi ê lah-sap-khuì phùn-hiòng káu-tsióng bô-kāng tsióng-luī ê tshiū-á, suà––lo̍h-khì kuan-tshat lâu-kuè tshiū-á ê huì-khì tiong, iù-phû-thôo-hún ê lông-tōo piàn-huà. I huat-kiàn tio̍h gîn-huâ-tshiū, âng-sam-á hām tsiap-kut-tan sann-tsióng tshiū-á, ē-sái kā tshiau-kuè 70-pha ê iù-phû-thôo-hún khip-siu. Iōng tiān-tsú-hián-bî-kiànn tsim-tsiok kā khuànn, tsit sann-tsióng tshiū-á ê tshiū-hio̍h-á liâm tsiânn tsē iù-phû-thôo-hún, jî-tshiánn hio̍h-á piáu-bīn nā lú tshoo a̍h-sī lú tsē iù-moo, ē-sái liâm lú tsē thôo-hún-lia̍p-á. Maher kā “The Scientist” tsa̍p-tsì kóng: tī tuā-lōo-pinn tsìng tsit sann-tsióng tshiū-á, ē-sái kā kok-tsióng kau-thong-kang-kū sóo pâi-hòng ê oo-ian lāi-té ê iù-phû-thôo-hún khip-siu, tuì lâng ê kiān-khong ē ū tuā lī-ik.

幼浮塗粉對人健康的危害早就毋是祕密矣，科學界已經發見欶傷濟幼浮塗粉，會增加人著痚呴、中風、心臟病、糖尿病、和失智症的機率。Maher教授佇往擺一篇研究嘛發見著，因為幼浮塗粉真幼，若予人欶入去鼻空內，有才調鑽入去腦部，影響著囡仔心智的發展。伊建議會使佇空氣汙染嚴重的所在加種寡樹仔，共垃圾的空氣清清的，毋過伊嘛提醒講：牢佇樹葉的汙染物若予雨水沖落塗，年久月深一直粒積了後，恐驚會有土地汙染的問題。所以透過種樹仔來改善空氣的品質干焦是治標，終其尾使用綠電和駛電動車才是咧治本，不而過佇現此時汽柴油車猶原是主流的交通工具的狀況之下，種樹仔會使講是咱佇進入綠電和電動車時代的過渡期的好法度。

Iù-phû-thôo-hún tuì lâng kiān-khong ê guî-hāi tsá tō m̄-sī pì-bi̍t––ah, kho-ha̍k-kài í-king huat-kiàn suh siunn tsē iù-phû-thôo-hún, ē tsing-ka lâng tio̍h he-ku, tiòng-hong, sim-tsōng-pēnn, thn̂g-jiō-pēnn, hām sit-tì-tsìng ê ki-lu̍t. Maher kàu-siū tī íng-pái tsi̍t-phinn gián-kiù mā huat-kiàn tio̍h, in-uī iù-phû-thôo-hún tsin-iù, nā hōo lâng suh-ji̍p-khì phīnn-khang-lāi, ū tsâi-tiāu tsǹg-ji̍p-khì náu-pōo, íng-hióng tio̍h gín-á sim-tì ê huat-tián. I kiàn-gī ē-sái tī khong-khì u-jiám giâm-tiōng ê sóo-tsāi ke tsìng kuá tshiū-á, kā lah-sap ê khong-khì tshing-tshing ê, m̄-koh i mā thê-tshénn kóng: tiâu tī tshiū-hio̍h ê u-jiám-bu̍t nā hōo hōo-tsuí tshiong-lo̍h-thôo, nî-kú-gue̍h-tshim it-ti̍t lia̍p-tsik liáu-āu, khióng-kiann ē ū thóo-tē u-jiám ê būn-tê. Sóo-í thàu-kuè tsìng-tshiū-á lâi kái-siān khong-khì ê phín-tsit kan-na sī tī-piau, tsiong-kî-bué sú-iōng li̍k-tiān hām sái tiān-tōng-tshia tsiah-sī teh tī-pún, put-jî-kò tī hiān-tshú-sî khì-tshâ-iû tshia iû-guân sī tsú-liû ê kau-thong-kang-kū ê tsōng-hóng-tsi-hā, tsìng tshiū-á ē-sái kóng sī lán tī tsìn-ji̍p li̍k-tiān hām tiān-tōng-tshia sî-tāi ê kuè-tōo-kî ê hó-huat-tōo.