全文朗讀 Tsuân-bûn lóng-tho̍k

毋知影逐家敢有印象，逐擺去洗溫泉抑是泅水的時，浸佇水裡一站仔，就會看著手佮跤指頭仔尾原底金滑的皮膚，成做皺皺敢若李仔乾的款式。這號現象佇跤腿、手骨和身軀別位的皮膚攏無，獨獨佇跤佮手指頭仔爾爾，實在誠怪。

M̄-tsai-iánn ta̍k-ke kám-ū ìn-siōng, ta̍k-pái khì sé-un-tsuânn a̍h-sī siû-tsuí ê sî, tsìm tī tsuí––ni̍h tsi̍t-tsām-á, tō ē khuànn-tio̍h tshiú kap kha tsíng-thâu-á bué guân-té kim-ku̍t ê phuê-hu, tsiânn-tsò jiâu-jiâu kánn-ná lí-á-kuann ê khuán-sit. Tsit hō hiān-siōng tī kha-thuí, tshiú-kut hām sing-khu pa̍t-uī ê phuê-hu lóng bô, to̍k-to̍k tī kha kap tshiú tsíng-thâu-á niā-niā, si̍t-tsāi tsiânn-kuài.

指頭仔浸水皺去的秘密 Tsíng-thâu-á tsìm-tsuí jiâu––khì ê pì-bi̍t

咱若是共手浸佇40度的溫水裡，約仔三分半鐘指頭仔尾就會皺皺，若是浸佇20度的冷水裡，著愛10分鐘較加。上頭先人認為是滲透造成的，也就是水滲入去指頭仔的皮膚內，予局部的表皮脹起來，致使皮膚外表看起來皺皺。毋過濟濟科學家攏憢疑這款講法，設使若干焦倚靠這號機制來成，咱指頭仔尾的皮膚上無嘛著脹20%遐爾仔大才會用得，現現就是傷譀。若準皺痕毋是透過皮膚吸水這款單純的物理機制來成的，到底是啥號因端造成的咧？

Lán nā-sī kā tshiú tsìm tī sì-tsa̍p tōo ê un-tsuí ni̍h, iok-á sann-hun puànn tsing tsíng-thâu-á bué tō ē jiâu-jiâu, nā-sī tsìm tī jī-tsa̍p tōo ê líng-tsuí––ni̍h, tio̍h-ài tsa̍p-hun tsing khah-ke. Siōng thâu-sing lâng jīn-uī sī siàm-thàu tsō-sîng ê, iā-tō-sī tsuí siàm-ji̍p-khì tsíng-thâu-á ê phuê-hu lāi, hōo kio̍k-pōo ê piáu-phuê tiùnn––khí-lâi, tì-sú phuê-hu guā-piáu khuànn––khí-lâi jiâu-jiâu. M̄-koh tsē-tsē kho-ha̍k-ka lóng giâu-gî tsit-khuán kóng-huat, siat-sú nā kan-na uá-khò tsit-hō ki-tsè lâi tsiânn, lán tsíng-thâu-á bué ê phuê-hu siōng-bô mā tio̍h tiùnn jī-tsa̍p-pha hiah-nī-á tuā tsiah ē-īng––tit, hiān-hiān tō-sī siunn-hàm. Nā-tsún jiâu-hûn m̄-sī thàu-kuè phuê-hu khip-tsuí tsit-khuán tan-sûn ê bu̍t-lí-ki-tsè lâi tsiânn ê, tàu-té sī siánn-hō in-tuann tsō-tsiânn ê leh?

早佇1930年代，就捌有醫生觀察著交感神經受損的人，𪜶的手指頭仔浸水了攏袂皺，暗示這个現象凡勢受交感神經的控制。交感神經屬自律神經的一類，伊無受咱的意識支配，主要管親像呼吸、心跳、血壓、流汗彼款對維持性命誠要緊的生理功能。斟酌觀察病人共手浸佇水裡所生出來的皺痕的形，醫生著通判斷伊的患者交感神經的功能敢有各樣。不而過，神經是按怎致到皺痕的形成，彼當陣的科學界猶閣霧嗄嗄。

Tsá tī 1930 nî-tāi, tō bat ū i-sing kuan-tshat tio̍h kau-kám-sîn-king siū-sún ê lâng, in ê tshiú-tsíng-thâu-á tsìm-tsuí liáu lóng bē jiâu, àm-sī tsit ê hiān-siōng huān-sè siū kau-kám-sîn-king ê khòng-tsè. Kau-kám-sîn-king sio̍k tsū-lu̍t-sîn-king ê tsi̍t luī, i bô siū lán ê ì-sik tsi-phuè, tsú-iàu kuán tshin-tshiūnn hoo-khip, sim-thiàu, hueh-ap, lâu-kuānn hit-khuán tuì î-tshî sènn-miâ tsiânn iàu-kín ê sing-lí kong-lîng. Tsim-tsiok kuan-tshat pēnn-lâng kā tshiú tsìm-tī tsuí-ni̍h sóo senn––tshut-lâi ê jiâu-hûn ê hîng, i-sing tio̍h thang phuànn-tuān i ê huān-tsiá ê kau-kám-sîn-king ê kong-lîng kám ū koh-iūnn. Put-jî-kò, sîn-king sī án-tsuánn tì-kàu jiâu-hûn ê hîng-sîng, hit-tang-tsūn ê kho-ha̍k-kài iáu-koh bū-sà-sà.

這个長期困擾科學界的問題予新加坡國立大學的神經學者Wilder-Smith感覺真趣味，決心欲蹽落去共伊好好仔稽考予清楚。Wilder-Smith教授思考講：因為交感神經一項誠要緊的功能就是控制血管內血量的大細，凡勢流對指頭仔的血液量的變化，就是皺痕形成的緣故。伊𤆬領的團隊，用超音波觀察手指頭仔內血流的速度變化，發見若共指頭仔浸佇水裡，指頭仔內的血管會勼，予流入來指頭仔的血液量較少，指頭仔尾就會皺皺。針對實驗的結果，Wilder-Smith推論講：手浸佇水裡的時陣，水會對指頭仔表皮濟濟原底咧負責出汗的毛管滲入去皮膚內，改變皮膚內底鹽份的濃度，鹽份濃度的變化會刺激交感神經，交感神經接紲會命令踮汗腺管四箍圍仔的血管收縮，減少流對指頭仔的血量，血量一下落，踮血管頂面的表皮隨就凹落去，致使原底紅紅閣金滑的指頭仔尾成做白白閣皺皺的款。這就若親像洘旱的時陣若抽傷濟地下水，常常會致到地下水層頂面的地層崩落去造成地層下陷彼款的現象。

Tsit ê tn̂g-kî khùn-jiáu kho-ha̍k-kài ê būn-tê hōo Sin-ka-pho kok-li̍p tāi-ha̍k ê sîn-king ha̍k-tsiá Wilder-Smith kám-kak tsin tshù-bī, kuat-sim beh liâu––lo̍h-khì kā i hó-hó-á khe-khó hōo tshing-tshó. Wilder-Smith kàu-siū su-khó kóng: in-uī kau-kám-sîn-king tsi̍t-hāng tsiânn iàu-kín ê kong-lîng tō-sī khòng-tsè hueh-kńg lāi hueh-liōng ê tuā-sè, huān-sè lâu-uì tsíng-thâu-á ê hueh-i̍k-liōng ê piàn-huà, tō-sī jiâu-hûn hîng-sîng ê iân-kòo. I tshuā-niá ê thuân-tuī, īng tshiau-im-pho kuan-tshat tshiú tsíng-thâu-á lāi hueh-liû ê sok-tōo piàn-huà, huat-kiàn nā kā tsíng-thâu-á tsìm-tī tsuí––ni̍h, tsíng-thâu-á lāi ê hueh-kńg ē kiu, hōo lâu-ji̍p-lâi tsíng-thâu-á ê hueh-i̍k-liōng khah-tsió, tsíng-thâu-á bué tō-ē jiâu-jiâu. Tsiam-tuì si̍t-giām ê kiat-kó, Wilder-Smith thui-lūn kóng: tshiú tsìm tī tsuí––ni̍h ê sî-tsūn, tsuí ē tuì tsíng-thâu-á piáu-phuê tsē-tsē guân-té leh hū-tsik tshut-kuānn ê mn̂g-kńg siàm ji̍p-khì phuê-hu lāi, kái-piàn phuê-hu lāi-té iâm-hūn ê lông-tōo, iâm-hūn lông-tōo ê piàn-huà ē tshì-kik kau-kám-sîn-king, kau-kám-sîn-king tsiap-suà ē bīng-līng tiàm kuānn-suànn-kńg sì-khoo-uî-á ê hueh-kńg siu-sok, kiám-tsió lâu tuì tsíng-thâu-á ê hueh-liōng, hueh-liōng tsi̍t ē lak, tiàm hueh-kńg tíng-bīn ê piáu-phuê suî tō nah––lo̍h-khì, tì-sú guân-té âng-âng koh kim-ku̍t ê tsíng-thâu-á bué tsiânn-tsò pe̍h-pe̍h koh jiâu-jiâu ê khuán. Tse tō ná-tshin-tshiūnn khó-huānn ê sî-tsūn nā thiu siunn tsē tē-hā-tsuí, siông-siông ē tì-kàu tē-hā-tsuí-tsân tíng-bīn ê tē-tsân pang––lo̍h-khì tsō-sîng tē-tsân-hā-hām hit-khuán ê hiān-siōng.

皺痕的利益 Jiâu-hûn ê lī-ik

開拆了皺痕形成的原理，咱紲落來來講寡伊對咱的利益，到底指頭仔浸水以後變甲皺皺通予咱啥物好處咧？2013年，一个英國的團隊揣來20个志願者，試驗皺痕對咱用手挈物件的影響。𪜶請志願者共手浸佇40度的溫水裡，聽候皺痕生出來了，就請𪜶用大頭拇佮指指去拈無仝大細、有澹嘛有焦的玻璃珠仔，仝款的實驗嘛請𪜶用焦焦無皺痕的手來做看覓。𪜶的結果顯示，用皺皺的指頭仔咧拈澹的玻璃珠仔有影並用金滑的指頭仔較在，較袂予伊落去，毋過對焦的玻璃珠仔來講就無精差，毋管指頭仔是皺皺抑是金滑，𪜶攏會使穩穩仔共珠仔拈牢咧，袂驚予伊落去。

Khui-thiah liáu jiâu-hûn hîng-sîng ê guân-lí, lán suà––lo̍h-lâi lâi kóng kuá i tuì lán ê lī-ik, tàu-té tsíng-thâu-á tsìm-tsuí í-āu piàn-kah jiâu-jiâu thang hōo lán siánn-mi̍h hó-tshù leh? 2013 nî, tsi̍t ê Ing-kok ê thuân-tuī tshuē-lâi 20 ê tsì-guān-tsiá, tshì-giām jiâu-hûn tuì lán īng tshiú khe̍h mi̍h-kiānn ê íng-hióng. In tshiánn tsì-guān-tsiá kā tshiú tsìm tī 40 tōo ê un-tsuí––ni̍h, thìng-hāu jiâu-hûn senn––tshut-lâi liáu, tō tshiánn in īng tuā-thâu-bú kap kí-tsáinn khì ni bô-kāng tuā-sè, ū tâm mā ū ta ê po-lê-tsu-á, kāng-khuán ê si̍t-giām mā tshiánn in īng ta-ta bô jiâu-hûn ê tshiú lâi tsò khuànn-māi. In ê kiat-kó hián-sī, īng jiâu-jiâu ê tsíng-thâu-á teh ni tâm ê po-lê-tsu-á ū iánn phīng īng kim-ku̍t ê tsíng-thâu-á khah tsāi, khah bē hōo i lak––khì, m̄-koh tuì ta ê po-lê-tsu-á lâi-kóng tō bô tsing-tsha, m̄-kuán tsíng-thâu-á sī jiâu-jiâu a̍h-sī kim-ku̍t, in lóng ē-sái ún-ún-á kā tsu-á ni tiâu leh, bē kiann hōo i lak––khì.

佇2020年，英國倫敦的科學博物館嘛得著仝款的實驗結果，𪜶這改招著500个人來做試驗，發見皺痕會增加手佮所掠的物之間的摩擦力，予咱免出偌濟力就會使共物仔掠予牢。

Tī 2020 nî, Ing-kok Lûn-tun ê kho-ha̍k phok-bu̍t-kuán mā tit-tio̍h kāng-khuán ê si̍t-giām kiat-kó, in tsit-kái tsio-tio̍h 500 ê lâng lâi tsò tshì-giām, huat-kiàn jiâu-hûn ē tsing-ka tshiú kap sóo-lia̍h ê mi̍h tsi-kan ê môo-tshat-li̍k, hōo lán bián tshut guā-tsē la̍t tō ē-sái kā mi̍h-á lia̍h hōo tiâu.

頂面這兩个實驗結果顯示浸水了予咱的指頭仔尾皺皺誠實有伊的路用，比論講咱的祖先若欲蹽水過河的時，有皺痕的跤底予𪜶佇滑滑的石頭頂嘛徛會在，袂驚跙倒。皺皺的手指頭仔毋但予𪜶通穩穩仔扞佇澹澹的石壁抑是樹枝，嘛會當佇水裡撈掠魚仔抑是抾蜊仔，實在不止仔利便。所致，後擺若閣拄著囡仔洗身軀抑是泅水的時，問大人為怎樣指頭仔尾皮肉會皺去，就知影按怎共𪜶解說矣。

Tíng-bīn tsit nn̄g ê si̍t-giām kiat-kó hián-sī tsìm-tsuí liáu hōo lán ê tsíng-thâu-á-bué jiâu-jiâu tsiânn-si̍t ū i ê lōo-īng, pí-lūn-kóng lán ê tsóo-sian nā beh liâu-tsuí kuè-hô ê sî, ū jiâu-hûn ê kha-té hōo in tī ku̍t-ku̍t ê tsio̍h-thâu tíng mā khiā ē tsāi, bē kiann tshū––tò. Jiâu-jiâu ê tshiú-tsíng-thâu-á m̄-nā hōo in thang ún-ún-á huānn tī tâm-tâm ê tsio̍h-piah a̍h-sī tshiū-ki, mā ē-tàng tī tsuí-ni̍h hôo-lia̍h hî-á a̍h-sī khioh lâ-á, si̍t-tsāi put-tsí-á lī-piān. Sóo-tì, āu-pái nā koh tú-tio̍h gín-á sé-sing-khu a̍h-sī siû-tsuí ê sî mn̄g tuā-lâng uī-tsuánn-iūnn tsíng-thâu-á bué ê phuê-bah ē jiâu––khì, tō tsai-iánn án-tsuánn kā in kái-sueh––ah.

參考資料 Tsham-khó tsu-liāu

Wilder-Smith EP, Chow A. Water-immersion wrinkling is due to vasoconstriction. Muscle Nerve. 2003 Mar;27(3):307-11.

Kareklas K, Nettle D, Smulders TV. Water-induced finger wrinkles improve handling of wet objects. Biol Lett. 2013 Jan 8;9(2):20120999.

Davis NJ. Water-immersion finger-wrinkling improves grip efficiency in handling wet objects. PLoS One. 2021 Jul 21;16(7):e0253185.