我是羅九安 (英文名Chiu-An Lo)， 我是 Canada McGill 大學神經科學的博士。佇 McGill 讀博士的過程當中，我觀察著現代分子生物學的快速發展，已經沓沓仔咧影響咱人類的生活。譬論講 iPS 人工多能性幹細胞和 CRISPR 基因編輯這兩項發明，已經佇濟濟領域帶來革命性的發展。 iPS 技術的發明者 Shinya Yamanaka 已經得著2012 年的 Nobel 獎。真濟學者預測開發 CRISPR 基因編輯技術的先行者嘛誠緊有可能會得著 Nobel 獎。毋過，遮的濟濟科學新知，並無受著多數主流媒體的重視，予大部分的人民繼續做科學文盲，實在真拍損。

我向望會當透過這个網站，來佮逐家分享一寡仔趣味閣重要的科學常識，幫助逐家成做有智慧的科學人。

Guá sī Lô Kiú-an (Ing-bûn-miâ  sī Chiu-An Lo), guá sī Canada McGill tāi-ha̍k sîn-king-kho-ha̍k ê phok-sū. Tī McGill tha̍k phok-sū ê kuè-thîng tang-tiong, guá kuan-tshat tio̍h hiān-tāi hun-tsú-sing-bu̍t-ha̍k ê khuài-sok huat-tián, í-king ta̍uh-ta̍uh-á leh íng-hióng lán jîn-luī ê sing-ua̍h. Phì-lūn kóng iPS jîn-kang to-kong-lîng-sìng kàn-sè-pau hām CRISPR ki-in pian-tsi̍p tsit nn̄g-hāng huat-bîng, í-king tī tsē-tsē líng-hi̍k tuà-lâi kik-bīng-sìng ê huat-tián. iPS ki-su̍t ê huat-bîng-tsiá Shinya Yamanaka í-king tit-tio̍h 2012 nî ê Nobel tsióng. Tsin tsē ha̍k-tsiá ī-tshik khai-huat CRISPR ki-in pian-tsi̍p ki-su̍t ê sian-hîng-tsiá mā tsiânn ū khó-lîng ē tit-tio̍h Nobel tsióng. M̄-koh, tsia––ê tsē-tsē kho-ha̍k-sin-ti, pīng bô siū tio̍h to-sòo tsú-liû muî-thé ê tiōng-sī, hōo tuā-pōo-hūn ê jîn-bîn kè-sio̍k tsò kho-ha̍k-bûn-bông, si̍t-tsāi tsin phah-sńg.

Guá ǹg-bāng ē-tàng thàu-kuè tsit ê bāng-tsām, lâi kap ta̍k-ke hun-hióng tsi̍t-kuá-á tshù-bī koh tiōng-iàu ê kho-ha̍k-siông-sik, pang-tsōo ta̍k-ke tsiânn-tsò ū tì-huī ê kho-ha̍k-lâng.