濟濟營養專家攏強調啉牛奶對囡仔的發育抑是大人欲維持健康骨質的重要性。毋過，有不止仔濟的非洲和亞洲人因為體質的緣故，對牛奶會過敏，大多數是因為欠缺會使分解 lactose 的酵素造成。Lactose 字面上的意思是乳醣 (milk sugar), 是一種干焦存在佇動物性牛奶佮羊奶內底的糖，為著欲吸收有夠額的營養佮避免過敏的問題，真濟人會改啉植物性的豆奶、米奶、椰子奶、抑是杏仁奶。按呢有人會問: 遮濟種選擇，啊是愛選佗一種較好咧？

Tsē-tsē îng-ióng-tsuan-ka lóng kiông-tiàu lim gû-ling tuì gín-á ê huat-io̍k a̍h-sī tuā-lâng beh uî-tshî kiān-khong kut-tsit ê tiōng-iàu-sìng. M̄-koh, ū put-tsí-á tsē ê Hui-tsiu hām A-tsiu-lâng in-uī thé-tsit ê iân-kòo, tuì gû-ling ē kuè-bín, tuā-to-sòo sī in-uī khiàm-khuat ē-sái hun-kái “lactose” ê kànn-sòo tsō-sîng. Lactose, jī-bīn-siōng ê ì-sù sī ling-tn̂g (milk sugar), sī tsi̍t tsióng kan-na tsûn-tsāi tī tōng-bu̍t-sìng ê gû-ling kap iûnn-ling lāi-té ê thn̂g. Uī tio̍h beh khip-siu ū kàu gia̍h ê îng-ióng kap pī-bián kuè-bín ê būn-tê, tsin tsē lâng ē kái lim si̍t-bu̍t-sìng ê tāu-ling, bí-ling, iâ-tsí-ling, a̍h-sī hīng-jîn-ling. Án-ne ū lâng ē mn̄g: Tsiah tsē tsióng suán-ti̍k, ah sī ài suán tó tsi̍t tsióng khah hó––leh?

針對這个問題，加拿大 McGill University 的研究人員發表論文表示，若以營養成份共𪜶分級，豆奶是牛奶以外上好的選擇，因為伊整體的營養成份上接近牛奶，雖然對濟濟人來講，伊的口味實在是無蓋好。杏仁奶、米奶、椰子奶雖然較好啉，但是𪜶的營養成份較低，無法度取代牛奶，成做主要的營養來源。

Tsiam-tuì tsit ê būn-thê, Canada McGill University ê gián-kiù jîn-uân huat-piáu lūn-bûn piáu sī, nā í îng-ióng-sîng-hūn kā in hun-kip, tāu-ling sī gû-ling í-guā siōng hó ê suán-ti̍k, in-uī i tsíng-thé ê îng-ióng-sîng-hūn siōng tsiap-kīn gû-ling, sui-jiân tuì tsē-tsē lâng lâi kóng, i ê kháu-bī si̍t-tsāi sī bô kài hó. Hīng-jîn-ling, bí-ling, iâ-tsí-ling sui-jiân khah hó lim, tān-sī in ê îng-ióng-sîng-hūn khah kē, bô-huat-tōo tshú-tāi gû-ling, tsiânn-tsò tsú-iàu ê îng-ióng-lâi-guân.