全文朗讀 Tsuân-bûn lóng-tho̍k
為著無愛予辛辛苦苦種起來的農作物予害蟲蛀歹去，農民定定會濺農藥。不而過，除了害蟲食著農藥會中毒死亡，其他的動物以及對農作物佮植物生湠有大利益的蟲豸，無的確嘛會受害，下底我簡單揀兩个例來共逐家做紹介：
Uī-tio̍h bô-ài hōo sin-sin-khóo-khóo tsìng––khí-lâi ê lông-tsok-bu̍t hōo hāi-thâng tsiù pháinn––khì, lông-bîn tiānn-tiānn ē tsuānn lông-io̍h. Put-jî-kò, tû-liáu hāi-thâng tsia̍h-tio̍h lông-io̍h ē tiòng-to̍k sí-bông, kî-tha ê tōng-bu̍t í-ki̍p tuì lông-tsok-bu̍t kap si̍t-bu̍t senn-thuànn ū tuā-lī-ik ê thâng-thuā, bô-tik-khak mā ē siū hāi, ē-té guá kán-tan kíng nn̄g-ê lē lâi kā ta̍k-ke tsò siāu-kài:
農藥對渡鳥的害 Lông-io̍h tuì tōo-tsiáu ê hāi
渡鳥就是彼號會綴季節變化做長途遷徙的鳥仔。佇𪜶遷徙的過程，常常會踮無仝所在歇睏順紲補充能量。佇美國和加拿大規遍的大田園，就提供遮的渡鳥做長途旅行的食物來源，不而過，除了予渡鳥有物通止枵，遐的大田園無疑悟嘛予渡鳥接觸著包括農藥在內的環境汙染物。
Tōo-tsiáu tō-sī hit hō ē tuè kuì-tseh piàn-huà tsò tn̂g-tôo tshian-suá ê tsiáu-á. Tī in tshian-suá ê kuè-thîng, siông-siông ē tiàm bô-kāng sóo-tsāi hioh-khùn sūn-suà póo-tshiong lîng-liōng. Tī Bí-kok hām Ka-ná-tah kui-phiàn ê tuā tshân-hn̂g, tō thê-kiong tsia-ê tōo-tsiáu tsò tn̂g-tôo-lú-hîng ê tsia̍h-mi̍h lâi-guân, put-jî-kò, tû-liáu hōo tōo-tsiáu ū mi̍h thang tsí iau, hia-ê tuā-tshân-hn̂g bô-gî-ngōo mā hōo tōo-tsiáu tsiap-tshiok tio̍h pau-kuat lông-io̍h tsāi-lāi ê khuân-kíng u-jiám-bu̍t.
類尼古丁（Neonicotinoid）會使講是現此時全球上普遍咧使用的農藥。伊是一種神經毒素，若和神經細胞表面的尼古丁受體結合，會拍歹神經系統的功能。因為伊佮蟲豸的神經細胞受體的結合力贏過佮脊椎動物受體的結合力誠濟，所以伊以早攏予人認定對脊椎動物的傷害毋成物。毋過，那來那濟研究攏指出，類尼古丁對鳥仔的健康佮行為的傷害不止仔大，尤其是彼號倚靠田園咧生活的鳥仔受的害特別傷重。根據統計，對1966年到2013年，佇北美洲就有74%的無仝鳥仔族群數量明顯減少，農藥的濫糝使用就予人憢疑是其中的一个大因端。
Luī-nî-kóo-ting (Neonicotinoid) ē-sái kóng sī hiān-tshú-sî tsuân-kiû siōng phóo-phiàn teh sú-iōng ê lông-io̍h. I sī tsi̍t-tsióng sîn-king-to̍k-sòo, nā hām sîn-king-sè-pau piáu-bīn ê nî-kóo-ting siū-thé kiat-ha̍p, ē phah-pháinn sîn-king-hē-thóng ê kong-lîng. In-uī i kap thâng-thuā ê sîn-king-sè-pau siū-thé ê kiat-ha̍p-li̍k iânn-kuè kap tsik-tsui-tōng-bu̍t siū-thé ê kiat-ha̍p-li̍k tsiânn tsē, sóo-í i í-tsá lóng hōo lâng jīn-tīng tuì tsik-tsui-tōng-bu̍t ê siong-hāi m̄-tsiânn-mi̍h. M̄-koh, ná lâi ná tsē gián-kiù lóng tsí-tshut, luī-nî-kóo-ting tuì tsiáu-á ê kiān-khong kap hîng-uî ê siong-hāi put-tsí-á tuā, iû-kî sī hit hō uá-khò tshân-hn̂g teh sing-ua̍h ê tsiáu-á siū ê hāi ti̍k-pia̍t siong-tiōng. Kin-kì thóng-kè, uì 1966 nî kàu 2013 nî, tī Pak-bí-tsiu tō-ū tshit-tsa̍p-sì-pha ê bô-kāng tsiáu-á tso̍k-kûn sòo-liōng bîng-hián kiám-tsió, lông-io̍h ê lām-sám sú-iōng tō hōo lâng giâu-gî sī kî-tiong ê tsi̍t-ê tuā in-tuann.
加拿大的學者佇今年九月的《科學》期刊，發表𪜶針對類尼古丁對飛過美國佮加拿大的渡鳥的影響所做的調查。𪜶發見食著予類尼古丁汙染的種子或是啉著濫著伊的水的渡鳥，會較厭𤺪食袂落物，致使𪜶體重輕、體脂肪量嘛低。因為飛長途的確愛有夠額的能量才會使得，遮的中毒的鳥仔著愛先共體內的毒素排除，恢復正常食食以後，才沓沓仔共飛行所需要的能量補轉來，所致，𪜶平均會比別隻鳥仔晏三工半才通起行。
Ka-ná-tah ê ha̍k-tsiá tī kin-nî káu––gue̍h ê “Kho-ha̍k” kî-khan, huat-piáu in tsiam-tuì luī-nî-kóo-ting tuì pue-kuè Bí-kok kap Ka-ná-tah ê tōo-tsiáu ê íng-hióng sóo-tsò ê tiâu-tsa. In huat-kiàn tsia̍h-tio̍h hōo luī-nî-kóo-ting u-jiám ê tsíng-tsí hi̍k-sī lim-tio̍h lām-tio̍h i ê tsuí ê tōo-tsiáu, ē khah ià-siān tsia̍h bē lo̍h mi̍h, tì-sú in thé-tāng khin, thé-tsi-hông liōng mā kē. In-uī pue tn̂g-tôo tik-khak ài ū kàu-gia̍h ê lîng-liōng tsiah ē-sái––tit, tsia-ê tiòng-to̍k ê tsiáu-á tio̍h ài sing kā thé-lāi ê to̍k-sòo pâi-tû, khue-ho̍k tsìng-siông tsia̍h-si̍t í-āu, tsiah ta̍uh-ta̍uh-á kā hui-hîng sóo su-iàu ê lîng-liōng póo––tńg-lâi, sóo-tì, in pîng-kin ē pí pa̍t tsiah tsiáu-á uànn sann-kang-puànn tsiah thang khí-kiânn.
雖罔渡鳥會當共食入體內的毒素排除，而且類尼古丁對鳥仔紲落去佇天頂飛的時陣走揣方向的能力嘛無影響，毋過類尼古丁對渡鳥的害嘛袂使講無大。比論講遷徙時間的延延無定著會予渡鳥袂赴佇天氣轉冷進前飛到位，佇歇睏的所在蹛傷久凡勢會增加予掠食者掠著的機率，另外嘛有學者憢疑講鳥仔的生育率無的確會受影響，終其尾危害著規个鳥仔族群的發展。
Sui-bóng tōo-tsiáu ē-tàng kā tsia̍h ji̍p thé-lāi ê to̍k-sòo pâi-tû, jî-tshiánn i tuì tsiáu-á suà––lo̍h-khì tī thinn-tíng pue ê sî-tsūn tsáu-tshuē hong-hiòng ê lîng-li̍k mā bô íng-hióng, m̄-koh luī-nî-kóo-ting tuì tōo-tsiáu ê hāi mā bē-sái kóng bô tuā. Pí-lūn kóng tshian-suá sî-kan ê iân-tshiân bô-tiānn-tio̍h ē hōo tōo-tsiáu bē-hù tī thinn-khì tsuán-líng tsìn-tsîng pue kàu-uī, tī hioh-khùn ê sóo-tsāi tuà siunn kú huān-sè ē tsing-ka hōo lio̍k-si̍t-tsiá lia̍h––tio̍h ê ki-lu̍t, līng-guā mā ū ha̍k-tsiá giâu-gî kóng tsiáu-á ê sing-io̍k-lu̍t bô-tik-khak ē siū íng-hióng, tsiong-kî-bué guî-hāi tio̍h kui-ê tsiáu-á tso̍k-kûn ê huat-tián.
農藥對蜜蜂的害 Lông-io̍h tuì bi̍t-phang ê hāi
蜜蜂會使講是幫贊農作物以及開花植物傳授花粉上重要的媒介，全世界有四分之三的農作物倚靠蜜蜂抑是蝶仔傳粉。農藥的使用頭起先是欲避免害蟲來食農作物，早前的作田人通常是共農藥濺向葉仔抑是果子，這種情形下較袂影響著蜜蜂，因為蜜蜂主要是採花心的粉和食花心的汁，也就是花蜜。毋過，為著予農作物會當得著齊全的保護，袂受塗裡的害蟲侵害，美國農民通常攏共種子規个浸過類尼古丁以後才掖種，紲落去伊puh穎出來的規欉植物攏會受著農藥的保護，甚至連花粉和花蜜嘛有淡薄仔類尼古丁的成份，致使對作物生存有大利益的蜜蜂佮野蜂嘛常常受毒害。
Bi̍t-phang ē-sái kóng sī pang-tsān lông-tsok-bu̍t í-ki̍p khui-hue-si̍t-bu̍t thuân-siū hue-hún siōng tiōng-iàu ê muî-kài, tsuân-sè-kài ū sì-hun-tsi-sann ê lông-tsok-bu̍t uá-khò bi̍t-phang a̍h-sī ia̍h-á thuân-hún. Lông-io̍h ê sú-iōng thâu-khí-sing sī beh pī-bián hāi-thâng lâi tsia̍h lông-tsok-bu̍t, tsá-tsîng ê tsoh-tshân-lâng thông-siông sī kā lông-io̍h tsuānn hiòng hio̍h-á a̍h-sī kué-tsí, tsit-tsióng tsîng-hîng-hā khah bē íng-hióng tio̍h bi̍t-phang, in-uī bi̍t-phang tsú-iàu sī tshái hue-sim ê hún hām tsia̍h hue-sim ê tsiap, iā-tō-sī hue-bi̍t. M̄-koh, uī-tio̍h hōo lông-tsok-bu̍t ē-tàng tit-tio̍h tsê-tsuân ê pó-hōo, bē siū thôo––ni̍h ê hāi-thâng tshim-hāi, Bí-kok lông-bîn thong-siông lóng kā tsíng-tsí kui-ê tsìm kuè luī-nî-kóo-ting í-āu tsiah iā-tsíng, suà––lo̍h-khì i puh-ínn tshut lâi ê kui-tsâng si̍t-bu̍t lóng ē siū tio̍h lông-io̍h ê pó-hōo, sīm-tsì liân hue-hún hām hue-bi̍t mā ū tām-po̍h-á luī-nî-kóo-ting ê sîng-hūn, tì-sú tuì tsok-bu̍t sing-tsûn ū tuā-lī-ik ê bi̍t-phang kap iá-phang mā siông-siông siū to̍k-hāi.
雖罔濫佇花粉和花蜜的類尼古丁濃度無偌懸，準講無細膩食著也無致命的風險，毋過伊確實是會傷害著蜜蜂的健康佮伊四界走揣花蜜和傳花粉的能力。舊年11月的《科學》期刊就刊一篇由美國學者Crall博士領導的研究，Crall佇研究室發見欶著摻類尼古丁的花蜜的蜂會較荏，較無心神通顧幼蜂，也較罕得參別隻蜂交陪。若觀察踮野外蜂岫內的狀況，伊嘛得著類似的結果。一般來講，蜂岫內底的工蜂，也就是受差用的蜂，會共蠟糊佇岫內一格一格貯蜜或是予幼蜂蹛的空房的壁，有這層蠟，毋但貯佇內底的蜜袂流出來，而且閣無透風，會使維持岫內的溫度，對規个蜂岫內蜂群的生存誠要緊。毋過受類尼古丁毒害的工蜂，袂做遮的工課來維持蜂岫內的溫度，造成幼蜂的生長受威脅，設使若攏無人要意，年久月深了後恐驚蜂就會愈來愈少，甚至有斷種的危機。
Sui-bóng lām tī hue-hún hām hue-bi̍t ê luī-nî-kóo-ting lông-tōo bô-guā-kuân, tsún-kóng bô-sè-jī tsia̍h––tio̍h iā bô tì-miā ê hong-hiám, m̄-koh i khak-si̍t sī ē siong-hāi tio̍h bi̍t-phang ê kiān-khong kap i sì-kè tsáu-tshuē hue-bi̍t hām thuân hue-hún ê lîng-li̍k. Kū-nî tsa̍p-it––gue̍h ê “Kho-ha̍k” kî-khan tō khan tsi̍t phinn iû Bí-kok ha̍k-tsiá Crall phok-sū líng-tō ê gián-kiù, Crall tī gián-kiù-sik huat-kiàn suh-tio̍h tsham luī-nî-kóo-ting ê hue-bi̍t ê phang ē khah lám, khah bô sim-sîn thang kòo iù-phang, iā khah hán-tit tsham pa̍t-tsiah phang kau-puê. Nā kuan-tshat tiàm iá-guā phang-siū lāi ê tsōng-hóng, i mā tit-tio̍h luī-sū ê kiat-kó. It-puann-lâi-kóng, phang-siū lāi-té ê kang-phang, iā-tō-sī siū tshe-īng ê phang, ē kā la̍h kôo tī siū lāi tsi̍t keh tsi̍t keh teh té-bi̍t hi̍k-sī hōo iù-phang tuà ê khang-pâng ê piah, ū tsit tîng la̍h, m̄-nā té tī lāi-té ê bi̍t bē lâu––tshut-lâi, jî-tshiánn koh bô thàu-hong, ē-sái î-tshî siū-lāi ê un-tōo, tuì kui-ê phang-siū lāi phang-kûn ê sing-tsûn tsiânn iàu-kín. M̄-koh siū luī-nî-kóo-ting to̍k-hāi ê kang-phang, bē tsò tsia-ê khang-khuè lâi î-tshî phang-siū lāi ê un-tōo, tsō-sîng iù-phang ê sing-tióng siū ui-hia̍p, siat-sú nā lóng bô-lâng iàu-ì, nî-kú-gue̍h-tshim liáu-āu khióng-kiann phang tō ē lú lâi lú tsió, sīm-tsì ū tn̄g-tsíng ê guî-ki.
因為濟濟對生態的威脅，歐盟佇舊年宣布禁止使用三類類尼古丁農藥，但是佇別國猶原閣咧用，欲按怎呼倚較濟國家同儕來減少使用類尼古丁，保護渡鳥佮蜜蜂，確實需要列位有志繼續拍拚，積極徛出來替咱的生態發聲。
In-uī tsē-tsē tuì sing-thài ê ui-hia̍p, Au-bîng tī kū-nî suan-pòo kìm-tsí sú-iōng sann luī luī-nî-kóo-ting lông-io̍h, tān-sī tī pa̍t-kok iû-guân koh teh iōng, beh án-tsuánn khoo-uá khah tsē kok-ka tâng-tsê lâi kiám-tsió sú-iōng luī-nî-kóo-ting, pó-hōo tōo-tsiáu kap bi̍t-phang, khak-si̍t su-iàu lia̍t-uī iú-tsì kè-sio̍k phah-piànn, tsik-ki̍k khiā––tshut-lâi thè lán ê sing-thài huat-siann.