全文朗讀 Tsuân-bûn lóng-tho̍k

人工智彗，也就是AI，會使講是這陣佇電腦科學裡上衝的領域，佇一般的新聞網站頂頭，伊嘛是一个不止仔時行的名詞，誠濟學者攏認為濟濟現此時免傷動頭殼的工課，𪜶所需要的人力連鞭就會予有人工智彗的機器人取代。毋過，AI嘛毋是干焦會共人搶飯碗若定，伊嘛會使做濟濟對人有大利益的代誌，比論講頂月日一个美國加州大學的團隊，就利用人工智彗予因為著傷無法度開喙講話的人，有才調透過電腦參別人交談。

Jîn-kang-tì-huī, iā-tō-sī AI, ē-sái kóng sī tsit-tsūn tī tiān-náu-kho-ha̍k––ni̍h siōng tshìng ê líng-hi̍k, tī it-puann ê sin-bûn bāng-tsām tíng-thâu, i mā-sī tsi̍t-ê put-tsí-á sî-kiânn ê miâ-sû, tsiânn-tsē ha̍k-tsiá lóng jīn-uī tsē-tsē hiān-tshú-sî bián siunn tāng-thâu-khak ê khang-khuè, in sóo su-iàu ê jîn-li̍k liâm-mī tō ē hōo ū jîn-kang-tì-huī ê ki-khì-lâng tshú-tāi. M̄-koh, AI mā m̄-sī kan-na ē kā lâng tshiúnn pn̄g-uánn nā-tiānn, i mā ē-sái tsò tsē-tsē tuì lâng ū tuā lī-ik ê tāi-tsì, pí-lūn kóng tíng gue̍h-ji̍t tsi̍t-ê Bí-kok Ka-tsiu-tāi-ha̍k ê thuân-tuī, tō lī-iōng jîn-kang-tì-huī hōo in-uī tio̍h-siong bô-huat-tōo khui-tshuì kóng-uē ê lâng, ū tsâi-tiāu thàu-kuè tiān-náu tsham pa̍t-lâng kau-tâm.

佇這个由人面冊（Facebook）所贊助的研究中，科學家揣來三位欲動手術的羊眩（癲癇）患者，這三个患者佇手術進前的一禮拜，醫生就先共幾若个電極囥踮𪜶的腦部，透過電極記錄羊眩患者的腦波變化，會當精確共羊眩發作的來源定位，幫贊紲落來的手術會當較準確無副作用。

Tī tsit-ê iû lâng-bīn-tsheh (Facebook) sóo tsàn-tsōo ê gián-kiù tiong, kho-ha̍k-ka tshuē lâi sann-uī beh tāng-tshiú-su̍t ê iûnn-hîn huān-tsiá, tsit sann-ê huān-tsiá tī tshiú-su̍t tsìn-tsîng ê tsi̍t-lé-pài, i-sing tō sing kā kuí-nā ê tiān-ki̍k khǹg tiàm in ê náu-pōo, thàu-kuè tiān-ki̍k kì-lo̍k iûnn-hîn huān-tsiá ê náu-pho piàn-huà, ē-tàng tsing-khak kā iûnn-hîn huat-tsok ê lâi-guân tīng-uī, pang-tsān suà––lo̍h-lâi ê tshiú-su̍t ē-tàng khah tsún-khak bô hù-tsok-iōng.

佇實驗裡，科學家準備九个問題來問這三个患者，以及二十四个答案予𪜶揀來回答，閣來就利用電極來記錄𪜶佇聽著問題佮回答的時陣的腦波變化。經過幾若改的試驗，累積夠額的資料以後，科學家就共遮的資料用來訓練電腦，予電腦會使根據腦波的型態，來判斷人所聽著的問題以及想欲講的答案是啥物，準確率分別有百分之七十六佮百分之六十一遐懸。

Tī si̍t-giām––ni̍h, kho-ha̍k-ka tsún-pī káu-ê būn-tê lâi mn̄g tsit sann-ê huān-tsiá, í-ki̍p jī-tsa̍p-sì-ê tap-àn hōo in kíng lâi huê-tap, koh lâi tō lī-iōng tiān-ki̍k lâi kì-lo̍k in tī thiann-tio̍h būn-tê kap huê-tap ê sî-tsūn ê náu-pho piàn-huà. King-kuè kuí-nā kái ê tshì-giām, luí-tsik kàu-gia̍h ê tsu-liāu í-āu, kho-ha̍k-ka tō kā tsia-ê tsu-liāu iōng-lâi hùn-liān tiān-náu, hōo tiān-náu ē-sái kin-kì náu-pho ê hîng-thài, lâi phuànn-tuān lâng sóo thiann-tio̍h ê būn-tê í-ki̍p siūnn beh kóng ê tap-àn sī siánn-mi̍h, tsún-khak-lu̍t hun-pia̍t ū pah-hun-tsi tshit-tsa̍p-la̍k kap pah-hun-tsi la̍k-tsa̍p-it hiah kuân.

這个新裝置的原理佮其他予醫生用來幫贊有語言溝通障礙的人講話的語音產生裝置無仝，因為一般的裝置倚靠人的喙䫌抑是下頦的筋肉收縮，來判斷𪜶想欲講的話，過程常常會有時間上的延遲嘛較𠢕脫箠。相比起來，這个具備人工智彗的新裝置，是利用人腦波圖來判斷聽著的問題和想欲回應的答案，反應時間會較短，予對話會較自然較滑溜。毋過，伊目前的使用範圍干焦限制佇彼9个問題和24个答案，若欲予人會當佇逐種無仝款的狀況，攏有才調透過伊來佮人開講，的確著愛用較大的資料庫來共伊訓練才會使得，這嘛是科學家這馬當咧做的計畫，向望未來電腦會當予人共因為著傷抑是著病所失去的溝通能力抾轉來。

Tsit-ê sin tsong-tì ê guân-lí kah kî-tha hōo i-sing iōng-lâi pang-tsān ū gí-giân koo-thong tsiòng-gāi ê lâng kóng-uē ê gí-im sán-sing tsong-tì bô-kāng, in-uī it-puann ê tsong-tì uá-khò lâng ê tshuì-phué a̍h-sī ē-hâi ê kin-bah siu-sok, lâi phuànn-tuān in siūnn beh kóng ê uē, kuè-thîng siông-siông ē ū sî-kan-siōng ê iân-tî mā khah gâu thut-tshuê. Sio-pí––khí-lâi, tsit-ê kū-pī jîn-kang-tì-huī ê sin-tsong-tì, sī lī-iōng lâng náu-pho-tôo lâi phuànn-tuān thiann––tio̍h ê būn-tê hām siūnn beh huê-ìng ê tap-àn, huán-ìng-sî-kan ē khah té, hōo tuì-uē ē khah tsū-jiân khah ku̍t-liu. M̄-koh, i bo̍k-tsîng ê sú-iōng huān-uî kan-na hān-tsè tī hit káu-ê būn-tê hām jī-tsa̍p-sì-ê tap-àn, nā beh hōo lâng ē-tàng tī ta̍k-tsióng bô-kāng khuán ê tsōng-hóng, lóng ū tsâi-tiāu thàu-kuè i lâi kah lâng khai-káng, tik-khak tio̍h ài iōng khah tuā ê tsu-liāu-khòo lâi kā i hùn-liān tsiah ē-sái––tit, tse mā-sī kho-ha̍k-ka tsit-má tng-teh tsò ê kè-uē, ǹg-bāng bī-lâi tiān-náu ē-tàng hōo lâng kā in-uī tio̍h-siong a̍h-sī tio̍h-pēnn sóo sit-khì ê koo-thong-lîng-li̍k khioh––tńg-lâi.

不而過，有其他的學者煩惱講，若是電腦的功能強甲會使共人的心內話讀出來，恐驚會去侵犯著病人的隱私。針對這个問題，研究團隊的主持人張教授表示講，伊設計的裝置干焦會使讀出對腦部的語言區傳向喙䫌筋肉的神經訊號，也就是人準備欲講出喙的話，無才調分析出人的心內話，逐家毋免傷煩惱。

Put-jî-kò, ū kî-tha ê ha̍k-tsiá huân-ló kóng, nā-sī tiān-náu ê kong-lîng kiông kah ē-sái kā lâng ê sim-lāi-uē tha̍k––tshut-lâi, khióng-kiann ē khì tshim-huān tio̍h pēnn-lâng ê ún-su. Tsiam-tuì tsit-ê būn-tê, gián-kiù-thuân-tuī ê tsú-tshî-jîn Tiunn kàu-siū piáu-sī kóng, i siat-kè ê tsong-tì kan-na ē-sái tha̍k-tshut tuì náu-pōo ê gí-giân-khu thuân-hiòng tshuì-phué kin-bah ê sîn-king-sìn-hō, iā-tō-sī lâng tsún-pī beh kóng-tshut-tshuì ê uē, bô-tsâi-tiāu hun-sik tshut lâng ê sim-lāi-uē, ta̍k-ke m̄-bián siunn huân-ló.